სტატია

აღმოაჩინე ჩვენი ბლოგი



10 საუკეთესო პროდუქტი დიეტისთვის

ადამიანის ორგანიზმი სხვა და სხვა პროდუქტს განსხვავებულად ითვისებს. თქვენი ფსიქოლოგიური განწყობები, კალორიების წვის მაჩვენებელი და თქვენს ორგანიზმში მიმდინარე ჰორმონალური ცვლილებები მნიშვნელოვნად არის დამოკიდებული იმ საკვებზე, რომელსაც თქვენ ყოველდღიურად იღებთ. თუ დიეტაზე ხართ და წონაში მატებისგან თავის დაზღვევა ან ზედმეტი კილოგრამებისგან გათავისუფლება გაქვთ გადაწყვეტილი, გთავაზობთ 10 საუკეთესო პროდუქტს, რომლებიც დასახული მიზნის მიღწევას გაგიმარტივებთ. თითოეული მათგანის ეფექტურობა არაერთი კვლევით არის დადასტურებული.

  • კვერცხი

გარკვეული დროის მანძილზე წონაში კლების და ჯანსაღად კვების მსურველი ადამიანები კვერცხს უფრთხოდნენ კიდეც, რადგან ის ქოლესტერინით საკმაოდ მდიდარია. თუმცა დროთა განმავლობაში აღნიშნული საკვები პროდუქტისადმი დამოკიდებულება მნიშვნელოვნად შეიცვალა. ახალი კვლევებით დადასტურდა, რომ ზომიერი რაოდენობით კვერცხის მიღება არც სისხლში ქოლესტერინის დონეს ცვლის და არც გულის შეტევის პროვოცირებას ახდენს. 30 ჭარბწონიან ქალბატონზე ჩატარებულმა კვლევამ აჩვენა, რომ საუზმედ კვერცხის მირთმევა ხანგრძლივი დანაყრების შეგრძნებას აჩენს და მომდევნო 36 საათის მანძილზე გადაძღომისგანაც გვიცავს. კიდევ ერთმა 8-კვირიანმა კვლევამ აჩვენა, რომ დაბალკალორიულ დიეტაზე მყოფ ადამიანებში საუზმეზე კვერცხის რეგულარულმა მირთმევამ წონაში კლების მაჩვენებლები მნიშვნელოვნად გააუმჯობესა. გარდა ამისა, კვერცხი წარმოუდგენლად მდიდარია მკვებავი ნივთიერებებით, რის გამოც დიეტაზე ყოფნისას საჭირო მინერალებითა და ვიტამინებით მოგამარაგებთ. განსაკუთრებით სასარგებლო ამ მხრივ კვერცხის გულია, რომელშიც თითქმის ყველა მკვებავი ნივთიერება გვხვდება.

  • მწვანილეული და მწვანე ბოსტნეული

განსაკუთრებით სასარგებლო პროდუქტებს შორის გვხვდება კომბოსტო კალე, ისპანახი და მხალი. ისინი წონაში კლებას მნიშვნელოვნად უწყობენ ხელს, რადგან დაბალკალორიულ და დაბალნახშირწყლოვან პროდუქტებს მიეკუთვნებიან. თითოეული მათგანი განსაკუთრებით მდიდარია უჯრედისითაც. როდესაც ზემოთ ჩამოთვლილ პროდუქტებს მიირთმევთ, საკვების მოცულობას და შემადგენლობას მნიშვნელოვნად ამდიდრებთ, ამასთან მის კალორიულობას არ ზრდით, რითაც თქვენს კვებით მოთხოვნილებასაც იკმაყოფილებთ და ზედმეტი კალორიების მიღებისგანაც იზღვევთ თავს. გარდა ამისა მწვანილეულსა და მწვანე ბოსტნეულს ხშირად ვიტამინებისა და ანტიოქსიდანტების წყაროდაც მოიხსენიებენ. ისინი განსაკუთრებით დიდი რაოდენობის კალციუმს შეიცავენ, რომელიც თავის მხრივ ცხიმის წვის პროცესის ხელშემწყობად გვევლინება.

  • ორაგული

ორაგული ისეთი თევზია, რომლის მირთმევისას უდიდეს სიამოვნებასაც განიცდით და დანაყრების შეგრძნებაც საკმაოდ დიდი ხნის მანძილზე არ გტოვებთ. ამასთან კალორიების მცირე რაოდენობას იღებთ. ორაგული ჯანსაღი ცილით, ცხიმით და სხვა მკვებავი ნივთიერებებით გაჯერებული პროდუქტია. თევზი (და ზოგადად ზღვის პროდუქტები) იოდის მარაგსაც შეგივსებთ. ორგანიზმში იოდის დონის რეგულირება ფარისებრი ჯირკვლის გამართულ მუშაობას უწყობს ხელს, ეს უკანასკნელი კი უდიდეს გავლენას ახდენს მეტაბოლურ პროცესებზე. კვლევებით დასტურდება, რომ ადამიანთა უმრავლესობა იოდის დეფიციტის პრობლემის წინაშე დგას. ორაგული მდიდარია ომეგა 3-ითაც, რომელიც ანთებითი პროცესების პრევენციას უწყობს ხელს. ცნობილია, რომ ორგანიზმში მიმდინარე ანთებით პროცესებს სიმსუქნის პროვოცირების უნარი შესწევთ. სარდინები, ქაშაყი და კალმახი, ასევე თევზის სხვა უამრავი სახეობა, წონაში კლების მსურველთათვის ძალიან სასარგებლო პროდუქტებად მიიჩნევა.

  • კომბოსტოსებრთა ოჯახის ბოსტნეული

კომბოსტოსებრთა ოჯახის ბოსტნეული, როგორებიცაა ბროკოლი, ყვავილოვანი კომბოსტო ან ბრიუსელის კომბოსტო, ბოჭკოთი ძალიან მდიდარია და დანაყრების ხანგრძლივ შეგრძნებას უწყობს ხელს. კომბოსტოსებრთა ოჯახის ბოსტნეული დიდი რაოდენობით შეიცავს პროტეინებსაც. ცხადია, ამ მხრივ ისინი ცხოველური წარმოშობის პროდუქტებს ან პარკოსნებს ვერ შეედრებიან, მაგრამ სხვა ბოსტნეულთან შედარებით, პროტეინს საკმაოდ დიდი რაოდენობით შეიცავენ. დაბალი ენერგეტიკული ღირებულების მქონე, მაღალპროტეინული და მაღალბოჭკოვანი პროდუქტები თქვენს რაციონში აუცილებლად უნდა ჩართოთ, თუ რა თქმა უნდა, მიზნად წონაში კლებას ისახავთ. გარდა ამისა, კომბოსტოსებრთა ოჯახის ბოსტნეული მკვებავი ნივთიერებებით ძალიან მდიდარია და სიმსივნის პრევენციისთვისაც აქტიურად გამოიყენება.

  • მჭლე საქონლის ხორცი და ქათმის გულ-მკერდი

საქონლის ხორცს ხშირად საკმაოდ უსამართლოდ აკრიტიკებენ. მას ბრალს დებენ სხვა და სხვა დაავადების განვითარების პროვოცირებასა და ხელშეწყობაში. მართალია, გადამუშავებული ხორცი საკმაოდ მავნეა, მაგრამ გადაუმუშავებელ წითელ ხორცს ვერც გულის პრობლემების გაჩენას დავაბრალებთ და ვერც დიაბეტის განვითარებაში დავადანაშაულებთ. სიმართლე ის არის, რომ საქონლის ხორცი წონაში კლებას უწყობს ხელს, რადგან ის პროტეინით მდიდარი პროდუქტია. მაღალპროტეინული საკვების მიღებით დღიურად 80-100 კალორიით მეტის დაწვა შეგიძლიათ. კვლევებით დასტურდება, რომ პროტეინის დღიური დოზის 25 %-ით გაზრდას შიმშილის შეგრძნებების 60 %-ით შემცირება შეუძლია. გარდა ამისა ღამით ჭამის სურვილი მნიშვნელოვნად მცირდება და  ერთი კვირის მანძილზე წონაში დაახლოებით ნახევარ კილომდე იკლებთ.

  • მოხარშული კარტოფილი

კარტოფილი დიეტის მიმდევრებში დიდი პოპულარობით არ სარგებლობს. მიუხედავად ამისა, ის საკმაოდ ჯანსაღი პროდუქტია და წონაში კლების მსურველებისთვის დიდი სარგებლის მოტანაც შეუძლია. კარტოფილი მკვებავი ნივთიერებების მრავალფეროვან არჩევანს გვთავაზობს. ის განსაკუთრებით მდიდარია კალიუმით. ადამიანთა უმეტესობა კალიუმის დეფიციტის პრობლემის წინაშე დგას. ამ უკანასკნელს კი არტერიული წნევის რეგულირებაზე დადებითი გავლენის მოხდენა შეუძლია. გარდა ამისა თეთრი კარტოფილი დანაყრების შეგრძნებას ხანგრძლივად შეგინარჩუნებთ.

  • თინუსი

თინუსი კიდევ ერთი დაბალკალორიული, მაღალპროტეინული საკვებია. თინუსი ცხიმებს საკმაოდ დაბალი რაოდენობით შეიცავს. თინუსი დიდი პოპულარობით სარგებლობს ბოდიბილდერებსა და ფიტნეს მოდელებს შორის, რომლებიც გამუდმებით ფორმაში იმყოფებიან. თინუსის დახმარებით მიღებული პროტეინების რაოდენობას მნიშვნელოვნად გაზრდით, ამასთან ზედმეტი კალორიების და ცხიმების მიღებისგანაც დაზღვეული იქნებით. დაკონსერვებული თინუსის მირთმევის შემთხვევაში, უპირატესობა მიანიჭეთ წყალში (და არა ზეთში) დაკონსერვებულ თევზს.

  • ლობიო და პარკოსნები

ლობიოს გარკვეული სახეობები და სხვა პარკოსნები წონაში კლებას მნიშვნელოვნად უწყობენ ხელს. განსაკუთრებით სასარგებლო ამ მხრივ ოსპი და შავი ლობიოა. აღნიშნული პროდუქტები ძალიან მდიდარია ბოჭკოთი და პროტეინებით. ერთადერთი პრობლემა, რაც პარკოსნებთან მიმართებაში იკვეთება, არის ის, რომ ადამიანთა დიდი რაოდენობა მათ მიმართ ტოლერანტული არ არის, რის გამოც პარკოსანთა სახეობები სიფრთხილით და ყურადღებით უნდა შეირჩეს.

  • წვნიანები

ხილი და ბოსტნეული დიდი რაოდენობით წყალს შეიცავს. წვნიანის მომზადებისას ბოსტნეულს და ხილს წყალს კიდევ უმატებენ. კვლევებმა დაადასტურა, რომ ერთი და იმავე პროდუქტის სუფთად ან წვნიანის სახით მირთმევა განსხვავებულ შედეგებს იძლევა. წვნიანით კვებისას დანაყრების შეგრძნება გაცილებით ძლიერია და მიღებული კალორიების რაოდენობაც მნიშვნელოვნად იკლებს. წვნიანის მომზადებისას დიდი რაოდენობით ცხიმებს ნუ გამოიყენებთ, რადგან ეს საკვების კალორიულობას გაზრდის.

  • ხაჭო

რძის პროდუქტები პროტეინებით ძალიან მდიდარია. განსაკუთრებით სასარგებლო პროდუქტად კი ხაჭო ითვლება. ის პროტეინს დიდი რაოდენობით შეიცავს, ნახშირწყლებს და ცხიმებს კი - ნაკლებად. ხაჭოს მიღებით პროტეინების მარაგს შეივსებთ. ამასთან კალორიების საკმაოდ მცირე რაოდენობას მიიღებთ და მარტივადაც დანაყრდებით. რძის პროდუქტები კალციუმითაც ძალიან მდიდარია. კალციუმი კი თავის მხრივ ცხიმის წვას უწყობს ხელს. დაბალკალორიულ და სასარგებლო რძის პროდუქტად ითვლება ბერძნული იოგურტიც. 

 

გაიარეთ ავტორიზაცია და შეაფასეთ სტატია


ცუდი

1 2 3 4 5 6 7 8 9 10

კარგი

10

დან 10

1 ხმა

დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა