სტატია

აღმოაჩინე ჩვენი ბლოგი



პეგანური დიეტა - უპირატესობები და ნაკლოვანებები

პეგანური დიეტა პალეოსა და ვეგანური დიეტების ძირითადი პრინციპების საინტერესო კომბინაციას გთავაზობთ. კვების აღნიშნული რეჟიმი სისხლში შაქრის დონის დაბალანსებას, ორგანიზმის ანთებითი პროცესებისგან დაცვასა და ჯანმრთელობის საერთო მდგომარეობის გამოსწორებას ისახავს მიზნად. ადამიანების უმეტესობა თვლის, რომ პალეოსა და ვეგანური დიეტების გაერთიანება პრაქტიკულად შეუძლებელია, თუმცა პეგანური დიეტის მიმდევრები ამას ნამდვილად ახერხებენ. პეგანური დიეტა პალეოსა და ვეგანური დიეტებისგან განსხვავებით კვების მეტად თავისუფალ რეჟიმსა და მრავალფეროვან რაციონს გთავაზობთ. გადამუშავებული პროდუქტების, არაჯანსაღი ცხიმების და შაქრის მაღალი შემცველობის მქონე საკვების მიღება გეკრძალებათ, თუმცა იშვიათ შემთხვევებში გამონაკლისის დაშვება შეგიძლიათ.

პეგანური დიეტა უმეტესად ხილისა და ბოსტნეულის აქტიურ მიღებაზეა ორიენტირებული, თუმცა ნორმალური დოზით ხორცის, თევზის, თხილის და პარკოსნების მირთმევაც შეგიძლიათ. თუ მოკლევადიანი და მკაცრი დიეტების დაცვა გირჩევნიათ, პეგანურ დიეტას ნუ მიმართავთ, რადგან აღნიშნული კვების პრინციპების ერთგულება საკმაოდ ხანგრძლივად მოგიწევთ.

რა უნდა მიირთვათ, თუ პეგანური დიეტის მიმდევარი ხართ?

პეგანური დიეტის მიმდევრებს გადაუმუშავებელი, ნატურალური პროდუქტების მიღება ევალებათ. უმჯობესია, თუ უპირატესობას ბოსტნეულსა და ჯანსაღ ცილებს მიანიჭებთ. თქვენ მიერ მიღებული საკვების 75 პროცენტი ხილისა და ბოსტნეულისგან უნდა შედგებოდეს. პეგანური დიეტის მიმდევრები დაბალი გლიკემიური ინდექსის მქონე პროდუქტებს ხშირად მიირთმევენ, რათა სისხლში შაქრის დონის ნორმალიზება შეძლონ. ისინი სახამებლიანი ბოსტნეულის მირთმევისგან თავს იკავებენ. თუ დიეტის დაცვას გადაწყვეტთ და სისხლში შაქრის შემცველობა იმთავითვე ზომიერი გექნებათ, შეგიძლიათ საკუთარ თავს ზოგჯერ შაქრის მაღალი შემცველობის მქონე ხილისა და სახამებლიანი ბოსტნეულის მირთმევის ნება დართოთ.

პეგანური დიეტა უპირატესობას ბოსტნეულს ანიჭებს, თუმცა ცილის მარაგის შესავსებად ცხოველური პროდუქტების მიღება დასაშვებია. ცილების სათანადო რაოდენობით მიღებისთვის ხორცის მირთმევა შეგიძლიათ, თუმცა, არა იმ რაოდენობით, რამდენსაც პალეოს დიეტის დაცვის შემთხვევაში მიირთმევდით. ამასთან, ვეგანებისგან განსხვავებით ხორცის რაციონიდან სრულად გამორიცხვა არ გევალებათ.  პეგანური დიეტის მიმდევრები თევზსაც რეგულარულად მიირთმევენ. ისინი უპირატესობას ისეთ თევზს ანიჭებენ, რომლებიც ვერცხლისწყლის დაბალი შემცველობით გამოირჩევიან, მაგ. სარდინები და ორაგული. პეგანური დიეტის მიმდევარი თუ ხართ, კვებისას მხოლოდ ჯანსაღი ცხიმები უნდა მიიღოთ.  უპირატესობა მიანიჭეთ თხილეულს, თუმცა არაქისი გამორიცხეთ, მიირთვით ავოკადო და ზეთისხილი, შეგიძლიათ ქოქოსის ზეთიც მიირთვათ  და ომეგა 3-ის დანამატის სახით მიღებაზეც ნუ იტყვით უარს.

პეგანური დიეტა უფლებას გაძლევთ ისეთი მარცვლეული მიიღოთ, რომელიც გლუტენს არ შეიცავს. აღნიშნული დიეტის მიმდევრები პარკოსნების მირთმევაზეც არ ამბობენ უარს, თუმცა მათი რამდენიმე სახეობის მიღება ეკრძალებათ. მათ დღის განმავლობაში მხოლოდ 125 გრამი მარცვლეულის და 75 გრამი პარკოსნების მირთმევის უფლება აქვთ. თუ პეგანური დიეტის დაცვას გადაწყვეტთ, შეგიძლიათ თავისუფლად მიირთვათ შვრია, ყავისფერი ბრინჯი, ოსპი, ბარდა და შავი ლობიო. აღნიშნული პროდუქტები მხოლოდ იმ შემთხვევაში უნდა შეზღუდოთ, თუ დიაბეტი გაწუხებთ.

რომელი პროდუქტების მიღება გეკრძალებათ?

პეგანური დიეტა საკმაოდ მრავალფეროვან რაციონს გთავაზობთ და ის პალეოს ან ვეგანურ დიეტასთან შედარებით ბევრად მოქნილიცაა. მიუხედავად ამისა, აღნიშნული დიეტის მიმდევრებს ძალიან ბევრი პროდუქტის მიღებაზე უხდებათ უარის თქმა. თუ პეგანურ დიეტას დაიცავთ, რძის ნაწარმი თქვენი საკვები რაციონიდან უნდა გამორიცხოთ, უარი უნდა თქვათ ისეთ პროდუქტებზე, რომლებიც გლუტენს შეიცავს, არც ისეთი პარკოსნები უნდა მიირთვათ, რომლებიც სისხლში შაქრის დონეს მაღლა წევს. პეგანური დიეტა შაქრის დანამატების მიღებას მკაცრად ზღუდავს, გარდა ამისა, მის მიმდევრებს რაფინირებული ცხიმებით, არომატიზატორებისა და საღებავების გამოყენებით დამზადებული პროდუქტების მიღებაც ეკრძალებათ.

პეგანური დიეტის უპირატესობები

პეგანურ დიეტას თქვენი ჯანმრთელობისთვის მრავალმხრივი სარგებლის მოტანა შეუძლია. ხილითა და ბოსტნეულით მდიდარი რაციონი მინერალების, ვიტამინებისა და ბოჭკოს ნამდვილ საბადოს წარმოადგენს. მკვებავი ნივთიერებებით გაჯერებული საკვები თქვენს ორგანიზმს ანთებითი პროცესების განვითარებისგან იცავს. პეგანური დიეტის მიმდევრები უპირატესობას ჯანსაღ ცხიმებს ანიჭებენ, რაც მათი გულის ჯანმრთელობაზე  დადებითად აისახება.

პეგანური დიეტის ნაკლოვანებები

პეგანური დიეტა ბევრი ჯანსაღი პროდუქტის მიღებას გიკრძალავთ. ის გარკვეული სახის პარკოსნების, რძის პროდუქტებისა და გლუტენის შემცველი მარცვლეულის მიღებას მკაცრად ზღუდავს. ბუნებრივია, თუ დიაბეტი გაქვთ ან გლუტენის აუტანლობა გაწუხებთ, მსგავსი შეზღუდვები გამართლებულია, მაგრამ თუ თქვენ ჯანმრთელი ადამიანი ხართ, აღნიშნულ პროდუქტებზე უარი არ უნდა თქვათ. მარცვლეული, რძის პროდუქტები და პარკოსნები ბევრ ისეთ მკვებავ ნივთიერებას შეიცავს, რომლებიც თქვენს ორგანიზმს სიძლიერისა და ჯანმრთელობისთვის აუცილებლად ესაჭიროება. თუ თქვენ მათ მიღებაზე უარს იტყვით, კვების პრინციპებში კარგად უნდა ერკვეოდეთ, რათა მკვებავი ნივთიერებების დანაკლისი სხვა პროდუქტებით შეივსოთ. პეგანური დიეტის მიმდევრები ცდილობენ მხოლოდ ნატურალური პროდუქტებით იკვებონ, რაც საკმაოდ რთულად მიიღწევა, რადგან აბსოლუტურად ორგანული საკვების მოპოვება თანამედროვე სამყაროში თითქმის შეუძლებელია.

პეგანური დიეტის რაციონის ნიმუში:

ორშაბათი

საუზმე - ომლეტი ბოსტნეულით, მწვანე სალათი ზეითუნის ზეთით.

ლანჩი - ხუჭუჭა კომბოსტოს სალათი ბარდით, მარწყვი და ავოკადო.

სადილი - ორაგული სტაფილოს საკმაზით, ბროკოლი და ლიმონის ძმარი.

სამშაბათი

საუზმე - ტკბილი კარტოფილის ტოსტი, ავოკადო, გოგრის თესლი და ლიმონის ძმარი.

ლანჩი - მოხარშული კვერცხი, თხლად დაჭრილი ინდაურის ხორცი, მაყვალი.

სადილი - ბოსტნეულის სალათი, მოხარშული ლობიო და პომიდორი.

ოთხშაბათი

საუზმე - მწვანე სმუზი ვაშლით, ნუშის კარაქი, ხუჭუჭა კომბოსტო.

ლანჩი - გამომცხვარი ბოსტნეული.

სადილი - გრილზე მომზადებული კრევეტები, ბოსტნეულის სალათი და ყავისფერი ბრინჯი.

ხუთშაბათი

საუზმე - ქოქოსის პუდინგი ნიგვზით, მაყვალი.

ლანჩი - მწვანე სალათი ავოკადოთი, გრილზე შემწვარი ქათამი და კიტრი.

სადილი - ბოლოკის სალათი და ცოტაოდენი საქონლის ხორცი.

პარასკევი

საუზმე - შემწვარი კვერცხი და ბოსტნეულის სალათი.

ლანჩი - ოსპის წვნიანი და მწვანე ბოსტნეული.

სადილი - ღორის ხორცი და ორთქლზე მომზადებული ბოსტნეული.

შაბათი

საუზმე - შვრია მაყვლითა და ნიგვზით.

ლანჩი - გრილზე მომზადებული ბოსტნეული და ოსპის წვნიანი.

სადილი - ბრიუსელის კომბოსტო, ბოსტნეულის სალათი და ნუში.

კვირა

 საუზმე - ომლეტი ბოსტნეულით და მწვანე სალათი.

ლანჩი - ტაილანდური სალათი, თხლად დაჭრილი ფორთოხალი.

სადილი - ღორის ხორცი და გრილზე მომზადებული ბოსტნეული.

პეგანური დიეტა თუ დაგაინტერესებთ, შეგიძლიათ თამამად სცადოთ და დააკვირდეთ, რა შედეგს მიიღებთ. თუ პალეოს ან ვეგანური დიეტის მიმდევარი უკვე ბრძანდებით, პეგანური დიეტის დაცვა არ გაგიჭირდებათ.

წარმატებებს გისურვებთ!

გაიარეთ ავტორიზაცია და შეაფასეთ სტატია


ცუდი

1 2 3 4 5 6 7 8 9 10

კარგი

0

დან 0

0 ხმა

დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა