სტატია

აღმოაჩინე ჩვენი ბლოგი



გახდომის ფსიქოლოგია, ანუ რატომ ვერ იკლებენ ქალები წონაში

შეცდომები, რომლებზეც ქვემოთ ვისაუბრებთ ძალიან ბევრი ქალბატონისთვის მთავარ ხელისშემშლელ ფაქტორს წარმოადგენს წონაში კლების რთულ გზაზე. ყურადღებით გაეცანით თითოეულ მათგანს და ეცადეთ მათ მაქსიმალურად აარიდოთ თავი.

რა არის გახდომის ფსიქოლოგია და რატომ გადავწყვიტეთ მის შესახებ საუბარი? ყველა გოგონა უნიკალურია და ბუნებრივია, ისინი ერთმანეთისგან ბევრი რამით განსხვავდებიან, მაგრამ რაც შეეხება ფიტნესს, აქ ისინი საერთო ქალური შეცდომების მსხვერპლნი ხშირად ხდებიან. თქვენ გაოცდებით, როდესაც დაინახავთ, თუ რა ტიპური ჩვევები აერთიანებთ ქალბატონებს სპორტდარბაზში ყოფნისას. შესაძლოა სტატიის კითხვისას საკუთარი შეცდომებიც აღმოაჩინოთ და მათგან თავის დაღწევა შეძლოთ. მაშ ასე, დროა დაივიწყოთ ყველაფერი, რაც გახდომაში ხელს გიშლით, შიმშილით დაწყებული 0,5 კილოგრამიანი განტელების გამოყენებით დასრულებული.

გთავაზობთ 10 ყველაზე გავრცელებულ ქალურ შეცდომას:

 

  • მე გახდომა მჭირდება

აღიარეთ, რამდენჯერ შეუპყრიხართ მსგავს ფიქრს. შესაძლოა სოციალურ ქსელში არ დაგიპოსტავთ, მაგრამ სარკესთან მდგომს, ალბათ, არაერთხელ გითქვამთ ეს საკუთარი თავისთვის. თუ ობიექტურად ამჩნევთ, რომ წონაში მოიმატეთ, ცხადია, ზედმეტი კილოგრამებისგან თავის დაღწევა გჭირდებათ, რადგან ეს თქვენი ჯანმრთელობისთვის მნიშვნელოვანია. თუმცა აღიარეთ, თქვენთვის გახდომა ცხიმის წვასთან ასოცირდება თუ ნაკლებ კილოგრამებთან?

ერთი შეხედვით სხვაობას ვერც ხედავთ. თუმცა თუ კარგად დააკვირდებით, წონის კლებას ყოველთვის თან არ ახლავს ცხიმის წვაც. ხოლო გასახდომი პროგრამები, როგორებიცაა ძალოვანი და კარდიო ვარჯიშები, გეხმარებათ კუნთოვანი მასის ზრდასა და გამოშრობაში. თქვენ კარგ ფორმებს იძენთ, მაგრამ ეს სულაც არ ნიშნავს იმას, რომ წონაში იკლებთ. შესაძლოა, ამ დროს ყველაფერი პირიქით მოხდეს. ნებისმიერი ფიტნეს-ტრენერი გეტყვით, რომ კუნთოვანი მასა ცხიმზე მძიმეა. სწორედ ამიტომ, გახდომაზე ოცნებისას ზედმეტი კილოგრამების მოცილებაზე კი ნუ იფიქრებთ, სხეულის ლამაზ ფორმებზე კონცენტრირდით.

 

  • კიდევ 2 კილოგრამი მოვიმატე

თქვენ დილას და საღამოს იწონებით. თქვენი მასის ნებისმიერ ცვლილებას მკაცრად აკონტროლებთ. წონის მცირედ მატებასაც პანიკით ხვდებით და განიცდით, როდესაც 500 გრამით მეტს იწონით. დაიმახსოვრეთ, რომ ციფრებს ამხელა მნიშვნელობა არ აქვს და თქვენ ამაოდ ღელავთ!

წონის ცვლილებაზე უამრავი რამ მოქმედებს, ამიტომ უმჯობესია თუ ყოველთვის დღის ერთსა და იმავე მონაკვეთში აიწონებით, რადგან თქვენი წონა უზმოზე და საღამოს ვახშმის შემდეგ სხვა და სხვა იქნება. თუ თქვენ ბევრ წყალს სვამთ, თქვენს საერთო წონაზე ესეც აისახება, მაგრამ ეს იმას სულაც არ ნიშნავს, რომ გასუქდით.

 

  • მე დიეტაზე ვარ

რომელ დიეტაზე ხართ? არჩევანი ხომ საკმაოდ დიდია. შესაძლოა ნახშირწყლებს არ ეკარებით და ოცნებობთ, როდის მიაღწევთ დიეტის ბოლო დღემდე, რომ მერე გული იჯეროთ და ყველაფერი მიირთვათ, რაც გსურთ. ნებისმიერი პროდუქტი, რომელსაც ხანგრძლივად მიირთმევთ, აუცილებლად შეუქმნის საფრთხეს თქვენს ჯანმრთელობას, რადგან დოზის გადაჭარბება ნებისმმიერ შემთხვევაში მავნეა. ცხადია ამაზე მოდურ ჟურნალებში ვერაფერს წაიკითხავთ, რადგან იქ მოდაზე წერენ და არა ჯანმრთელობაზე.

დიეტას ორი მნიშვნელოვანი ნაკლი აქვს: 1). ის დროში შეზღუდულია და თქვენ გამუდმებით მის ბოლო დღეზე ფიქრობთ 2). თქვენ უამრავი რამით იზღუდებით და შემდგომ, როდესაც დიეტას ასრულებთ, გაცილებით მეტს იმატებთ, ვიდრე დაიკელით. თუ გსურთ, სასურველი შედეგი მიიღოთ, არჩევანი საბოლოოდ უნდა შეაჩეროთ ჯანსაღ კვებაზე და წონაში აღარასდროს მოიმატებთ. მიირთვით პროდუქტები, რომლებიც საჭირო მკვებავ ნივთიერებებს შეიცავენ. მიირთვით ხშირად და მცირე ულუფებით. ასეთი გააზრებული კვებით, თქვენ არაჩვეულებრივ ფორმასაც შეინარჩუნებთ, კალორიებსაც გააკონტროლებთ და თითოეული პროდუქტითაც ისიამოვნებთ, რომელსაც მიირთმევთ.

 

  • თუ ამის აუცილებლობა დადგა, ტრენაჟორით ვისარგებლებ

ბევრს სმენია იმის შესახებ, რომ კარდიო ვარჯიშები წონაში კლებას უწყობს ხელს, თუმცა ბევრმა არ იცის, რომ ამის პარალელურად ჯანსაღი კვება და დამატებითი ვარჯიშები აუცილებელია.

წონაში კლებისთვის გაცილებით სასარგებლოა ველოტრენაჟორებისა და სარბენი ბილიკების გამოყენება, რადგან ისინი წინაღობის გაძლიერებასა და სტიმულაციას უწყობენ ხელს. შესაბამისად თუ კარდიო ვარჯიშები თქვენ სასურველ შედეგს არ გაძლევთ, ე.ი. მხოლოდ მათ იმედად ხართ, რაც კიდევ ერთი შეცდომაა, რომელიც გახდომის სურვილმა დაგაშვებინათ.

 

  • გასახდომი აბების გამოყენებას ვგეგმავ

ბუნებრივია თქვენ გსმენიათ გასახდომი აბების, ჩაების, მწვანე ყავის და სხვა მცენარეული საშუალებების შესახებ, რომლებიც დღეს დიდი პოპულარობით სარგებლობს, მაგრამ რამდენად კარგად იცნობთ მათ შემადგენლობას, რა იცით იმ უარყოფითი გავლენის შესახებ, რომელსაც ისინი თქვენს ორგანიზმზე ახდენენ?

როგორც წესი გასახდომი აბების ანოტაციაში ყოველთვის მითითებულია, რომ მიღებამდე ექიმის კონსულტაცია აუცილებელია. ამას ყურადღება უნდა მიაქციოთ. შესაძლოა მსგავსი აბები თქვენთვის უკუნაჩვენები იყოს. გასახდომი აბები ორგანიზმის სტიმულაციის გზით ახდენენ ზედმეტი ცხიმების წვას, აჩქარებენ მეტაბოლიზმის პროცესს, რაც უარყოფითად აისახება ძირითად ორგანოებზე, მაგ. გულზე. ამასთან, აბების დღეში 3-ჯერ მიღება არ ნიშნავს იმას, რომ თქვენ უფლება გექნებათ ის მიირთვათ, რაც გსურთ, ან ვარჯიშს არ დაუთმოთ დრო. ცხადია, წონის დაკლება ამის გარეშე მაინც არ გამოვა.

დაიმახსოვრეთ, მსგავსი აბები შესაძლოა ძალიან სახიფათო იყოს, თუ მათ არასწორად მოიხმართ.

 

  • უპირატესობას სალათებს მივანიჭებ

სალათები შესაძლოა, მართლაც მდიდარი იყოს მკვებავი ნივთიერებებით და ისინი ჯანსაღი კვებისთვის ნამდვილად გამოგადგებათ, მაგრამ ყურადღება უნდა მიაქციოთ, თუ რა ტიპის სალათებს მიირთმევთ. ზოგჯერ ქალბატონები უარს ამბობენ უვნებელი სენდვიჩების მირთმევაზე და უპირატესობას ანიჭებენ სალათებს, რომლებშიც უხვად არის შებოლილი პროდუქტები. მსგავს სალათებში ბევრი ცხიმი და ცოტა მკვებავი ნივთიერებაა.

ყველა სალათი ერთნაირად სასარგებლო არ არის. თუ მეტისმეტად მსუყე სალათებს მიირთმევთ, შეგიძლიათ იგი პიცითაც ჩაანაცვლოთ. თუ თქვენ ნამდვილად ჯანსაღი სალათის მირთმევა გსურთ, მის მოსამზადებლად გამოიყენეთ დაბალკალორიული და სასარგებლო პროდუქტები, როგორებიცაა : ისპანახი, ბროკოლი, პომიდორი და ა.შ. დამატეთ ცილები: ლობიო, თხილეული და უცხიმო ყველი უკეთესი გემოსთვის.

 

  • ვცდი და საუზმეს გამოვტოვებ

კვების ექსპერტები თვლიან, რომ ბალანსირებული საუზმე წონის კლებას უწყობს ხელს. რატომ?

ღამის შიმშილის შემდეგ ორგანიზმში მეტაბოლური პროცესები ნელდება. საუზმე უნდა აღიქვათ, როგორც მეტაბოლიზმის პროცესის გამაცოცხლებელი ძალა. სასარგებლო მკვებავი ელემენტებით მდიდარი საუზე დღის განმავლობაში  გადაძღომისგანაც დაგიცავთ.

თუ საუზმეს გამოტოვებთ, სადილზე გაცილებით მეტს შეჭამთ, ვიდრე საჭიროა, რაც თქვენი წონისთვის არასახარბიელოა. საუზმე გაღვიძებიდან 45 წუთში უნდა მიირთვათ. სასურველია, ის მსუბუქი იყოს.

 

  • უფრო გამხდარი ხელებისთვის აზიდვებს გავაკეთებ

ყველამ ვიცით, რომ არსებობს ლოკალური ზონებისთვის განკუთვნილი ვარჯიშები, მაგრამ ეს სულაც არ ნიშნავს იმას, რომ მსგავსი ტიპის ვარჯიშები ცხიმებს მხოლოდ კონკრეტულ მონაკვეთში წვავენ. ასეთი რამ უბრალოდ შეუძლებელია. მართალია, ისინი ამა თუ იმ კუნთს აძლიერებენ და ამაგრებენ, მაგრამ ცხიმების წვა მხოლოდ და მხოლოდ მაშინაა შესაძლებელი, როდესაც დახარჯული კალორიების რაოდენობა მიღებულისას აღემატება. თუ თქვენ ხელის ზონიდან ზედმეტი ცხიმების დაწვა გსურთ, უსარგებლო კალორიების მიღება შეწყვიტეთ და კარდიო ვარჯიშებს დაუთმეთ დრო.

 

  • მძიმე მასას არ შევეჭიდები, თორემ ფორმებს დავიმახინჯებ

არსებობს მოსაზრება, რომ შტანგა და განტელები მხოლოდ მამაკაცებისთვისაა. ქალების უმეტესობა ფიქრობს, რომ  მსგავსი ტიპის ვარჯიშები ქალს მასკულინურ არსებად აქცევს.

მსგავს ცრურწმენებთან ბრძოლაში ფიტნეს-გოგონების ფოტოების დათვალიერება დაგეხმარებათ. ისინი წარმოუდგენლად ლამაზ და მიმზიდველ ფიგურას მხოლოდ აერობიკით ნამდვილად არ იყენებენ. ფიტნესით დაკავებული ქალებიც ხშირად მიმართავენ ჟიმს, აზიდვებსა და სხვა მძიმე ვარჯიშებს, როგორც მამაკაცები.

 

  • იმდენ დაბალცხიმოვან პროდუქტს  მივირთმევ, რამდენსაც მოვისურვებ

დაბალცხიმოვანი პროდუქტიც შესაძლოა საზიანო აღმოჩნდეს, რადგან მათი დაბალცხიმოვნება არ გულისხმობს იმას, რომ ისინი კალორიებს არ შეიცავენ.

მთავარია იცოდეთ, დღის მანძილზე რამდენ კალორიას იღებთ. თავად პროდუქტის კალორიულობას მნიშვნელობა არ აქვს.

დაბალცხიმოვანი პროდუქტიდან 500 კალორიის მიღებისას ბუნებრივია, გაცილებით მეტად მოიმატებთ წონაში ვიდრე მაღალცხიმოვანი პროდუქტის მეშვეობით 100 კალორიის შეძენისას.

 

იმედია, ჩვენს რჩევებს გაითვალისწინებთ და ზემოთ ჩამოთვლილ ტრადიციულ შეცდომებს აღარ გაიმეორებთ.

გისურვებთ წარმატებებს!

 

 

 

 

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა