ცნობილი ფიტნეს-ინსტრუქტორის რჩევები მამაკაცებს
ცნობილი პერფორმერი, ჯანსაღი ცხოვრების წესის კონსულტანტი და ნაიკის წამყვანი ფიტნეს-ინსტრუქტორი, ჯო ჰოლდერი ფიტნეს იმპერიის შემოქმედად მოგვევლინა. მან ეს რეალური გეგმების შემუშავებით და ჯანმრთელობაზე ორიენტირებული ფიტნეს-რეჟიმის დამკვიდრებით შეძლო. მას უამრავი მიმდევარი ჰყავს ინსტაგრამზე. ჯოს ფიტნესსა და ჯანსაღი ცხოვრების წესზე თავისი უნიკალური შეხედულებები აქვს და ის ყველაფერს ფართო პერსპექტივიდან უყურებს. ცნობილია, რომ ჰოლდერი ვეგეტარიანელია. ის ისეთი ცნობილი მოდელების პირადი ფიტნეს-ინსტრუქტორი იყო, როგორებიც არიან ნაომი კემპბელი და ბელა ჰადიდი. მისი უნიკალობა იმაში მდგომარეობს, რომ არ აქვს მნიშვნელობა თქვენი გეგმები რამდენად ამბიციურია, ეჭვიც არ უნდა შეგეპაროთ, რომ ჯო ჰოლდერს თქვენი დახმარება შეუძლია. იქნება ეს ზედმეტი ცხიმების მოცილება თუ მასის მატება, მისი დახმარების იმედი უნდა გქონდეთ.
ჩვენ გაგაცნობთ ჯო ჰოლდერის ფიტნეს-ფილოსოფიას, რომელიც ორიენტირებულია შექმნას სრულყოფილი სავარჯიშო რეჟიმი მასშტაბური წარმატების მისაღწევად. მაშ ასე, ვიწყებთ:
- ივარჯიშეთ, როგორც ქალმა
ჯოს მოცემული თეზისი წინასწარგანზრახულად არის შერჩეული, როგორც დამაბნეველი და ორაზროვანი. „ნუ აყვებით გენდერულ საკითხებს მეტისმეტად, როდესაც საქმე ეხება ფიტნესს, ჯანსაღი ცხოვრების წესსა და ვარჯიშს. თუ ქალბატონები ისე ივარჯიშებდნენ, როგორც მამაკაცები, ხოლო მამაკაცები ისე, როგორც ქალები, გაცილებით მეტი ადამიანი მოახერხებდა დასახული ფიტნეს მიზნების მიღწევას.“ - აცხადებს ჰოლდერი. მისი აზრით, მამაკაცების უმრავლესობა სტერეოტიპულად ჩაციკლულია ძალოვან ვარჯიშებზე, ისინი გამუდმებით საკუთარ ამტანობას ამოწმებენ და ყურადღებას არ აქცევენ ელასტიურობასა და მობილობას. მაშინ როდესაც ქალბატონები ასევე ამოჩემებულად მიმართავენ კარდიოს. ისინი აქტიურად არიან დაკავებული იოგითა და პილატესით. ეს არ ეხება ყველას. არსებობენ მამაკაცები, რომლებსაც ძალიან მოსწონთ იოგა და მისგან სიამოვნებასაც იღებენ, ისევე როგორც ქალბატონები, რომლებიც მძიმე წონის აწევას არ ერიდებიან. მიუხედავად ამისა, სტერეოტიპულობის დაღი ფიტნესს ნამდვილად ემჩნევა. ჯო ჰოლდერის რჩევით, უმჯობესია, თუ ადამიანი თავის ჩვეულ რეჟიმს გადაახალისებს და მასში მცირე სავარჯიშო ციკლებს ჩართავს სიახლის სახით. მაგ. თუ თქვენ გამუდმებით ამტანობას ამოწმებთ და აზიდვებით ხართ დაკავებული, კარგი იქნებოდა, თუ ამ ყოველივეს იოგა დაგიბალანსებდათ, ხოლო თუ პირიქითაა, უმჯობესი იქნებოდა, თუ ძალოვან ვარჯიშებს მცირედ ყურადღებას მაინც დაუთმობდით.
- მიირთვით მკვებავი ნივთიერებებით გაჟღენთილი პროდუქტები
აქ ველოსიპედის ხელახლა გამოგონებას ნამდვილად არ ვცდილობთ. აუცილებელია, ადამიანმა, რომელიც ჯანსაღი ცხოვრების წესს მისდევს, თავის დიეტაში ჩართოს მრავალფეროვანი პროდუქტები, რომლებიც მკვებავი ნივთიერებებით იქნება გაჟღენთილი, რადგან ეს ორგანიზმს სავარჯიშოდ ამზადებს, აძლევს მას საჭირო ენერგიას, ეხმარება მას სიჯანსაღის შენარჩუნებაში და აკმაყოფილებს ადამიანის ორგანიზმის უნიკალურ მოთხოვნებს. „თავად მე მცენარეულ საკვებზე ვარ ორიენტირებული, რადგან ცხოვრების მანძილზე უამრავი ტრავმა და დაზიანება მიმიღია. მსგავსი ტიპის საკვები კი გამოჯანსაღებაში ყველაზე მეტად დამეხმარა.“ - აღნიშნავს ჯო ჰოლდერი. ეს იმას სრულებით არ ნიშნავს, რომ ოპტიმალური ჯანმრთელობის მდგომარეობის მისაღწევად, თქვენც ვეგანი ან ვეგეტარიანელი უნდა გახდეთ. მთავარია, სათანადო ყურადღებით მოეპყროთ საკუთარ სხეულს, საკუთარ ორგანიზმს და მოუსმინოთ მის მოთხოვნებს. „მთავარი ფოკუსი უნდა გქონდეთ იმაზე, თუ როგორ ეპასუხება თქვენი ორგანიზმი ამა თუ იმ საკვებს.“ - გვაფრთხილებს ცნობილი ფიტნეს-ინსტრუქტორი. თუ გრძნობთ, რომ რძის პროდუქტების გადამუშავება ძალიან გიჭირთ, ან გლუტენზე ორგანიზმი არასასურველ რეაქციას იძლევა და სტრესში იმყოფებით, ან ნებისმიერი სახის პროდუქტზე გაქვთ უარყოფითი შეგრძნებები, აუცილებლად მიმართეთ კვების ექსპერტს ან ალერგოლოგს. თქვენი ორგანიზმის პასუხი ამა თუ იმ საკვების მიღებაზე, შეგრძნებები, რომლებიც გეუფლებათ ჭამის შემდეგ, დიდ გავლენას ახდენს თქვენს გამძლეობაზე და იმაზე, თუ როგორ რეაგირებთ ამა თუ იმ სტრესორზე, მაგ. დამღლელ და დატვირთულ სავარჯიშო გრაფიკზე.
- დასვენება და ძალების აღდგენა პრიორიტეტული უნდა იყოს
„უმეტესად, როდესაც სავარჯიშოდ მივდივართ და ჩვენს მაქსიმუმს ვაკეთებთ, გვავიწყდება, რომ დასვენებაც საჭიროა და ვარჯიშის შემდეგ ძალების აღდგენას არ ვცდილობთ.“- აღნიშნავს ჰოლდერი. თქვენი მიღწევები პირდაპირ კავშირშია დასვენების რეჟიმთან, იმასთან თუ რამდენად აღიდგენთ დაკარგულ ძალებს. ძილში თქვენ იზრდებით და ჯანსაღდებით. ყველაზე დიდ პრობლემას ადამიანებისთვის, სწორედ მოცემული რჩევის გათვალისწინება და პრაქტიკაში განხორციელება წარმოადგენს. ადეკვატური ძილის რეჟიმის ჩამოყალიბებას ძალიან იშვიათად ახერხებენ. „გააცნობიერეთ, როგორი სტრატეგია მუშაობს თქვენს შემთხვევაში. თუ ეს არის მასაჟი ან ცივი აბაზანა, მაშინ ისინი თქვენი რეჟიმის განუყრელ ნაწილად უნდა აქციოთ.“ - გირჩევთ ჯო ჰოლდერი.
- გადაჭარბებული პოზიტიურობა საჭირო არ არის
დიახ, თქვენ არ მოგესმათ. საჭირო არ არის გამუდმებით პოზიტიურ განწყობაზე იყოთ. ცხადია, აუცილებელია, გაიმხნევოთ თავი და თავდაჯერება მოგემატოთ, როგორც დარბაზში, ასევე მის გარეთაც, მაგრამ ზოგჯერ აუცილებელია პესიმისტურად ფიქრიც, რათა გონება და სხეული გაიძლიეროთ. „თქვენ გსმენიათ გონების გათიშვისა და მედიტაციის შესახებ. გონებასა და სხეულს შორის წარმოუდგენლად მჭიდრო ურთიერთკავშირი არსებობს, რის შესახებაც ხშირად ვივიწყებთ.“ - აღნიშნავს ჰოლდერი. შესრულების ხარისხის გაუმჯობესების ერთ-ერთი გზა სწორედ ეს არის, რომ თქვენი გონება განსხვავებულად ამუშაოთ, მიაჩვიოთ ის კონტრასტსა და ცვლილებებს. „იფიქრეთ მოსალოდნელ უარყოფით სცენარზე და გააცნობიერეთ, როგორ უპასუხებთ მას. უმჯობესია, ცუდისთვის იყოთ მზად, ვიდრე წარუმატებლობას გვერდი აუაროთ.“
- იყავით ორიენტირებული წინსვლაზე
თქვენს ვარჯიშში ჩართული უნდა იყოს სხვა უამრავი მხარეც, გარდა უშუალოდ ფიტნესისა. თქვენ უნდა გყავდეთ მწვრთნელი, ფიტნეს-ინსტრუქტორი, სპეციალისტი, რომელიც ფიტნესში თქვენს მიზნებს რეალობად აქცევს, ამასთან უნდა გყავდეთ ისეთი ადამიანიც, რომელიც სამედიცინო კუთხით გაგიწევთ დახმარებას. იპოვეთ ისეთი ექიმი ან თერაპევტი, რომელიც თქვენს ჯანმრთელობას უფრო მაღალ საფეხურზე აიყვანს. გამოიყენეთ ჰოლისტური მიდგომა. არ იფიქროთ, მხოლოდ ახალ სტრატეგიებზე, რომლებსაც თქვენს ვარჯიშში ჩართავთ, იფიქრეთ ადამიანებზე, რომლებიც თქვენს გვერდით უნდა იყვნენ. მთავარია, თქვენს უნარებს ყურადღება მიაქციოთ, თქვენი შესაძლებლობები გამოათავისუფლოთ და მათ გზა გაუხსნათ. აუცილებელია, თქვენ ირგვლივ არსებული ყველა რესურსი გამოიყენოთ, რათა მრავალმხრივად განვითარდეთ.
წარმატებებს გისურვებთ!
