სტატია

აღმოაჩინე ჩვენი ბლოგი



7 მიზეზი, რის გამოც ვარჯიშით წონაში ვერ იკლებთ 

თქვენ ხშირად ვარჯიშობთ, ჯანსაღად იკვებებით, მაგრამ წონაში შესამჩნევად მაინც ვერ იკლებთ. თუ საკუთარ თავთან მეტად გულწრფელები იქნებით, აღმოაჩენთ, რომ მეტი მონდომების გამოჩენა გჭირდებათ. წონაში კლება მაშინ იწყება, როდესაც თქვენ საკვებს აღიქვამთ, როგორც ენერგიის ძირითად წყაროს და არა განწყობის გასაუმჯობესებელ საშუალებას.  არ აქვს მნიშვნელობა ვინ ხართ და როგორ ცხოვრობთ. დიდი ალბათობით, ქვემოთ ჩამოთვლილ 7 მიზეზთაგან რომელიმე მათგანი თქვენი ჭარბი წონის რეალური მიზეზია. გავეცნოთ თითოეულ მათგანს.

საკვებს სწორად ვერ არჩევთ

თუ წონაში კლებას ვერ ახერხებთ, პირველი ადგილი, სადაც უნდა შეიხედოთ, სამზარეულოა. ადამიანები დიდ ყურადღებას უთმობენ კალორიების წვის პროცესს, მაგრამ ნაკლებად ფიქრობენ იმაზე, თუ რა სახის პროდუქტებს იღებენ ენერგიისთვის. დიეტას თქვენს წარმატებაში 80 % -იანი წვლილი აქვს. საკვები, რომელსაც უნდა მიირთმევდეთ თქვენი სხეულის ტიპის, მეტაბოლიზმის და სხვა მნიშვნელოვანი ფაქტორების გათვალისწინებით უნდა შეარჩიოთ. საუკეთესო არჩევანი ორგანული, გადაუმუშავებელი პროდუქტების მიღებაა. მიირთვით სახამებლიანი ნახშირწყლები (კარტოფილი, ბრინჯი, მარცვლეული), როდესაც მძიმე დატვირთვით ვარჯიშობთ. სხვა დღეებში კი, როდესაც მსუბუქი კარდიოთი ხართ დაკავებული, პროტეინებს და ბოსტნეულს მიანიჭეთ უპირატესობა. თავი აარიდეთ პურს, შაქარს და ნებისმიერი სახის გადამუშავებულ პროდუქტს.

თქვენ ჭარბ საკვებს მიირთმევთ

თუ თქვენი დიეტა ჯანსაღი პროდუქტებით არის გაჯერებული და მავნე საკვებისგან თავი შორს გიჭირავთ, მაგრამ მაინც ვერ ხდებით, ე.ი. ზედმეტად ბევრს იკვებებით. ზედმეტი კილოგრამების მოსაშორებლად, თქვენს ორგანიზმს კალორიების დეფიციტი ესაჭიროება, რაც იმას ნიშნავს, რომ თქვენ გაცილებით მეტი კალორია უნდა დაწვათ, ვიდრე ღებულობთ. ამასთან ორგანიზმი მეტისმეტად არ უნდა გაიღარიბოთ. ბალანსის შენარჩუნება აუცილებელია. კალორიებს ყოველდღიურად ნუ დაითვლით და ხშირად ნუ აიწონებით. ასე ფსიქიკას გაინადგურებთ. იკვებეთ მაშინ, როდესაც გშიათ. ჭამეთ ნელა და მშვიდად, რათა გადაძღომა თავიდან აირიდოთ. ჯანსაღი ხემსი დაგეხმარებათ დღის განმავლობაში ზედმეტი კალორიების მიღებისგან თავის დაცვაში.  იშვიათად თავს  სასარგებლო ტკბილეულით  ტკბობის ნება მიეცით. მიირთვით შავი შოკოლადი და ისიამოვნეთ.

კარდიოს ძალიან ბევრ დროს უთმობთ

რა თქმა უნდა, კარდიო თქვენი სავარჯიშო რუტინის მნიშვნელოვან ნაწილს უნდა წარმოადგენდეს. ის თქვენს გულს აძლიერებს, მეტაბოლიზმს აუმჯობესებს და კალორიების წვასაც უწყობს ხელს. რეალურად კი მხოლოდ კარდიოს შესრულება, ან მისთვის გადაჭარბებული დროის დათმობა, პრობლემას უფრო ამძაფრებს. ხანგრძლივი 90 წუთიანი კარდიო მეტაბოლიზმის პროცესს აფერხებს და წონაში კლება გაგიჭირდებათ. ასეთი ტემპით ვარჯიში ორგანიზმს გამუდმებით წინაღობისთვის მზადების რეჟიმში ამყოფებს, რის გამოც ცხიმების დაგროვების პროცესი ძლიერდება. ორგანიზმი ცხიმს იმარაგებს, რათა ენერგიის წყარო ჰქონდეს. გარდა ამისა თქვენი მადა დრამატულად იზრდება, რის გამოც ხშირად გიჩნდებათ მოთხოვნა არასაჭირო ხემსი მიირთვათ, ან გადაძღომის საფრთხის წინაშე დგებით.

მძიმე წონით აზიდვებს არ ასრულებთ

წონაში კლება თუ გსურთ, კარდიოსთან ერთად სხვა სახის ვარჯიშების შესრულება აუცილებლად გჭირდებათ. საუკეთესო გზა ცხიმების დასაწვავად და კუნთოვანი მასის გასაზრდელად, ძალოვანი ვარჯიშია. კუნთოვანი მასის მატებასთან ერთად ცხიმის წვის პროცესი ძლიერდება. თუ კარდიოსთვის თავის დანებებას ვერ ახერხებთ, უპირატესობა ინტერვალურ ვარჯიშებს მიანიჭეთ. აღნიშნული ტიპის კარდიო გაცილებით სასარგებლოა ზედმეტი კილოგრამების მოსაშორებლად. აუცილებლად ჩართეთ თქვენს რუტინაში წინაღობით ვარჯიშებიც. მიმართეთ საკუთარი სხეულის წონის გამოყენებით ვარჯიშებს, გააკეთეთ აზიდვები, ჩაჯდომები და ცხადად დაინახავთ, რომ თქვენი ზედმეტი კილოგრამები  უკან დახევას დაიწყებენ.

საკმარისად არ იტვირთებით

თქვენს ორგანიზმზე მორგებული სავარჯიშო რუტინისა და დიეტის შერჩევა საკმაოდ რთულია. დარბაზში ბევრი დროის გატარება სულაც არ ნიშნავს იმას, რომ წონაში შესამჩნევად დაიკლებთ. თუ ათლეტი ან ბოდიბილდერი არ ხართ, დღის განმავლობაში 1 საათზე მეტს არ უნდა ვარჯიშობდეთ. თქვენი ყურადღება ვარჯიშის ინტენსივობას უნდა დაუთმოთ და არა მის ხანგრძლივობას.  დაიმახსოვრეთ, თუ საკმარისი დატვირთვით ვარჯიშობთ, თქვენი აქტივობა ხანგრძლივი ვერ იქნება. საკმარისი ინტენსივობით ვარჯიში დაგეხმარებათ მეტაბოლიზმის გააქტიურებაში არამხოლოდ დარბაზში ყოფნისას, არამედ მისი დატოვების შემდეგ რამდენი საათის განმავლობაში.

ძალების აღდგენას სათანადო ყურადღებას არ უთმობთ

სრულფასოვანი ვარჯიშის შემდეგ თავს ბედნიერად გრძნობთ. ამ დროს აუცილებელია საკუთარ სხეულზე კონცენტრირება. როდესაც მთელი სხეულის გასაძლიერებელ ვარჯიშებს ასრულებთ და შედეგით კმაყოფილი ხართ, მეორე დღეს აუცილებლად უნდა დაისვენოთ. შეგიძლიათ დრო განტვირთვისა და გაწელვის ვარჯიშებს დაუთმოთ ან მსუბუქი კარდიოთი დაკმაყოფილდეთ. დასვენება და ძალების აღდგენა ხშირად ვარჯიშზე მნიშვნელოვანიც კია. სწორედ მოსვენების პროცესში წვავს თქვენი ორგანიზმი ყველაზე მეტ კალორიას. მიეცით საკუთარ თავს უფლება ძალები სრულად აღიდგინოს და მხოლოდ ამის შემდეგ განაგრძეთ ვარჯიში. უსმინეთ საკუთარ სხეულს. დატვირთეთ ის, როგორც საჭიროა, მაგრამ მისდამი სიყვარულისა და მზრუნველობის გამოვლენაც არ დაგავიწყდეთ.

თქვენი ორგანიზმი ზედმეტი სტრესის ქვეშაა

ვარჯიში თქვენი სხეულისთვის ერთ-ერთი სტრესორია. როდესაც თქვენ ვარჯიშსა და განტვირთვას შორის  იდეალური ბალანსის პოვნას ახერხებთ, თქვენი ორგანიზმი ზედმეტ ცხიმებს წარმატებით წვავს. თუ საკმარისად არ დაისვენებთ, თქვენს ორგანიზმში სტრესის ჰორმონი კორტიზოლი ჭარბად გამომუშავდება. კორტიზოლი ვარჯიშისას საჭირო ჰორმონია. ის ენერგიით გამარაგებთ, მაგრამ მისი ჭარბი გამომუშავება  კარგს არაფერს მოგიტანთ. შესაძლოა, შედეგად გარკვეულ ადგილებში ცხიმების დაგროვების პრობლემის წინაშე აღმოჩნდეთ. ვარჯიში ერთადერთი სტრესორი არ არის, რომელიც კორტიზოლის ჭარბ გამომუშავებას უწყობს ხელს. სტრესულმა სამუშაომ ან ცხოვრების სტილმაც შეიძლება მის ჭარბ გამოყოფას შეუწყოს ხელი. ვარჯიშის შეწყვეტასთან ერთად თქვენი ორგანიზმი კორტიზოლის გამომუშავებას წყვეტს. თუმცა მენტალური სტრესორების თავიდან მოშორება არც ისე ადვილია. ფიზიკურ ჯანმრთელობასთან ერთად, ყურადღება მიაქციეთ თქვენს ფსიქიკურ მდგომარეობას. აუცილებელია, მთელი ორგანიზმის ჯანმრთელობაზე იზრუნოთ, რაც გულისხმობს, როგორც ფიზიკურ, ასევე სულიერ კარგად ყოფნასაც.

წარმატებებს გისურვებთ!

 

 

 

 

 

 

 

 

 

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა