წონაში კლება წყლის დახმარებით
კვლევებით დასტურდება, რომ წყლის საკმარისი რაოდენობით მიღება წონაში კლებისთვის ძალიან მნიშვნელოვანია. ჰიდრატაციის მაღალი ხარისხი გადამწყვეტ როლს ასრულებს საკვების გადამუშავების პროცესში და აუმჯობესებს კუნთების მდგომარეობას. სამედიცინო სფეროს წარმომადგენლები წონაში კლებასა და დიდი რაოდენობით წყლის მიღებას შორის დადებით კავშირზე საბოლოო დასკვნას მაინც ვერ აკეთებენ. სტატიაში განვიხილავთ, თუ რა გავლენა აქვს წყალს წონაში კლების პროცესზე და რა რაოდენობით წყალი უნდა მიიღოს ადამიანმა, თუ მას ზედმეტი კილოგრამებისგან გათავისუფლება სურს.
მკვლევარები დარწმუნებით ვერ ამბობენ, თუ რატომ უწყობს წყალი წონაში კლებას ხელს, თუმცა ვერ უარყოფენ, რომ დიდი რაოდენობით წყლის მიღებასა და წონის კლებას შორის დადებითი კორელაცია არსებობს. გთავაზობთ 6 სავარაუდო მიზეზს, რომელთა გამოც წყალი ზედმეტი კილოგრამებისგან გათავისუფლებაში გეხმარებათ.
წყალი მადის ბუნებრივი ჩამხშობია
სავსე და დანაყრებული კუჭი ტვინს სიგნალებს გადასცემს და ატყობინებს, რომ კვების პროცესი დასრულებულია. წყალი კუჭში საკმაოდ დიდ სივრცეს იკავებს და დანაყრების შეგრძნებას აჩენს, რაც საკვებზე მოთხოვნილებას ამცირებს. ადამიანებს, რომლებსაც წყურიათ, ხშირად ჰგონიათ, რომ შიათ. ერთი ჭიქა წყლის დალევა ხშირად არასასურველი ხემსისგან თავის დაზღვევაში დაგეხმარებათ. 50 ჭარბწონიან ადამიანზე დაკვირვებით დადგინდა, რომ საუზმის, სადილის და სამხრის წინ წყლის მიღება ზედმეტი ცხიმებისა და კილოგრამებისგან გათავისუფლებას მართლაც უწყობს ხელს. აღნიშნული კვლევა რამდენჯერმე ჩატარდა და შედეგები ყოველთვის იდენტური აღმოჩნდა.
წყალი კალორიების წვის პროცესს აუმჯობესებს
კვლევებით ასევე დასტურდება, რომ წყლის მიღება კალორიების წვის პროცესს მნიშვნელოვნად აუმჯობესებს. 12 ადამიანზე ჩატარებულმა კვლევამ აჩვენა, რომ ცივი ან ოთახის ტემპერატურის წყლის საკმარისი რაოდენობით მიღება ენერგიის მატებას უწყობს ხელს, ამასთან წყლის მიღებიდან 90 წუთის მანძილზე 2-3 %-ით მეტი კალორია იწვება, ვიდრე ჩვეულებრივ მდგომარეობაში. წყლის დალევა კალორიების წვას მოსვენებულ მდგომარეობაშიც უწყობს ხელს. წყლის მიღების შემდგომ ორგანიზმი საკვების მონელების პროცესისთვის ემზადება, რა დროსაც ის დიდ ენერგიას ხარჯავს და კალორიებიც დიდი რაოდენობით იწვება.
წყალი ხელს უწყობს ორგანიზმიდან ტოქსინების გამოდევნას
დეჰიდრატაციის პირობებში ორგანიზმი ვერ ახერხებს ექსკრემენტების ან შარდის საშუალებით ზედმეტი ტოქსინებისა და შლაკებისგან გათავისუფლებას. წყალი თირკმლებს ორგანიზმის ფილტრაციაში ეხმარება, რაც დეჰიდრატაციის დროს ვერ ხერხდება. წყალი ორგანიზმს ელექტროლიტებისა და მკვებავი ნივთიერებების ბალანსის შევსებაშიც უწევს დახმარებას. დეჰიდრატაცია ყაბზობის ერთ-ერთი მთავარი მიზეზია. წყლის საკმარისი რაოდენობით მიღება კი მონელების პროცესს მნიშვნელოვნად აუმჯობესებს. წყალი სასარგებლოა მათთვისაც, ვისაც დიარეა ან დისპეპსია აწუხებს. როდესაც ორგანიზმში შლაკებისა და ტოქსინების დაგროვება ხდება, ადამიანს შებერილობა, შეშუპება და დაღლილობა აწუხებს. გარდა ამისა, ზემოთ ჩამოთვლილი მონელების პრობლემები, ჭარბი წონის ჩამოყალიბებასაც უწყობს ხელს. ორგანიზმის ტოქსინებისგან გაწმენდა წყლის დახმარებით მარტივად შეგიძლიათ. ასე რომ, წყლის საჭირო რაოდენობით მიღებაზე უარს ნუ იტყვით.
წყალი სითხეების საშუალებით ზედმეტი კალორიების მიღებისგან დაგიცავთ
კალორიების თხევადი სახით მიღება ძალიან მარტივია. ამისთვის საკმარისია ტკბილი გაზიანი წყლის, ჩაის ან ყავის ერთი ფინჯანი მიირთვათ. ადამიანები ყურადღებას არ აქცევენ იმ ფაქტს, რომ სპორტული სასმელებისა და ალკოჰოლის სახითაც საკმაოდ დიდი რაოდენობის კალორიებს იღებენ. ყოველდღიურად მსგავსი სასმელების წყლით ან დაბალკალორიული ბალახოვანი ჩაებით ჩანაცვლება წონაში კლების პროცესს გაგიმარტივებთ. სიმსუქნის პრობლემის მქონე ადამიანებზე ჩატარებულმა კვლევამ აჩვენა, რომ 6 თვის მანძილზე მაღალკალორიული სასმელების წყლით ყოველდღიურმა ჩანაცვლებამ წონაში კლების მაჩვენებლები 2,5 %- ით გააუმჯობესა. კვლევა ჩატარდა ადამიანებზეც, რომლებიც ლანჩის შემდეგ 1 ჭიქა წყალს მიირთმევდნენ. მათი წონაში კლების მაჩვენებლები 13, 6 %-ით გაუმჯობესდა იმ ადამიანებთან შედარებით, რომლებიც უპირატესობას დიეტურ სასმელებს ანიჭებდნენ.
წყალი ცხიმის წვის პროცესს აჩქარებს
წყლის გარეშე ორგანიზმს არ შეუძლია დაგროვილი ცხიმებისა და ნახშირწყლების სათანადო გადამუშავება. ცხიმის წვის პროცესს სხვაგვარად ლიპოლიზსაც უწოდებენ. აღნიშნული პროცესი ჰიდროლიზით იწყება, რაც წყლის ზემოქმედებით რთული ნივთიერების დაშლას გულისხმობს. წყლის საკმარისი რაოდენობით მიღება აუცილებელია, როგორც კანქვეშ დაგროვილი ცხიმის, ასევე საკვებისა და სასმელის მეშვეობით მიღებული ცხიმების დასაწვავად. ცხოველებზე ჩატარებული კვლევა ადასტურებს, რომ დიდი რაოდენობით წყლის მიღება ლიპოლიზის პროცესს აჩქარებს და ცხიმის წვა გაცილებით ეფექტურად მიმდინარეობს.
წყალი ვარჯიშის დროს შესრულების ხარისხს ამაღლებს
წონაში კლების პროცესი ვარჯიშის გარეშე წარმოუდგენელია. წყალი კუნთებს, სახსრებსა და შემაერთებელ ქსოვილს უკეთ მოძრაობაში ეხმარება. ის ასევე აუმჯობესებს გულის, ფილტვებისა და სხვა მნიშვნელოვანი ორგანოების ფუნქციონირებას. ვარჯიშის დროს კი თითოეულ მათგანზე სერიოზული დატვირთვა მოდის, შესაბამისად, ფიზიკური დატვირთვის დროს, მათი სიჯანსაღე ორგანიზმისთვის უმნიშვნელოვანესია. ჰიდრატაციის მაღალი ხარისხი ვარჯიშის დროს ისეთი არასასიამოვნო გართულებებისგან დაგიცავთ, როგორებიცაა დაღლილობა და კუნთების ტკივილი. დეჰიდრატაციის თავიდან ასაცილებლად აუცილებლად მიირთვით წყალი ვარჯიშამდე, ვარჯიშის დროს და მის შემდეგაც. ვარჯიშისას წყლის ახლოს ქონა ძალიან მნიშვნელოვანია, განსაკუთრებით თუ მზიან, ცხელ ამინდში ვარჯიშობთ, ან დახურულ სივრცეში იმყოფებით.
რა რაოდენობით წყალი უნდა მიირთვათ?
წყლის ოპტიმალური რაოდენობის განსაზღვრა ძალიან რთულია და მოცემულ საკითხთან დაკავშირებით სტანდარტული რეკომენდაციების გაცემა შეცდომაა. ადამიანებს სხვა და სხვა რაოდენობით წყალი ესაჭიროებათ. დღის განმავლობაში მისაღები წყლის მოცულობა დამოკიდებულია მთელ რიგ ფაქტორებზე, მათ შორისაა: ადამიანის დატვირთვის ხარისხი, ასაკი, სხეულის პროპორციები, ჯანმრთელობის სტატუსი, ტემპერატურა, ჰაერის ტენიანობა და ა.შ. ამერიკის სამედიცინო აკადემიის ცნობით დღის მანძილზე ადამიანმა საშუალოდ 3700 მილილიტრი წყალი უნდა მიიღოს, თუ ის მამაკაცია, ხოლო 2700 თუ ქალბატონია.
წყლის საკმარისი რაოდენობით მიღება
კვლევებმა აჩვენა, რომ მოზარდი მამაკაცების უმეტესობა ყოველდღიურად დღიურ ნორმასთან შედარებით გაცილებით მეტ წყალს მიირმევს, ხოლო მოზრდილი ადამიანები გაცილებით ნაკლებ წყალს სვამენ. 20-50 წლამდე ადამიანებში მამაკაცების 42,7 %, ხოლო ქალების 40,6 პროცენტი წყალს არასაკმარისი რაოდენობით იღებს. 71 წელს გადაცილებულ მამაკაცებში კი აღნიშნული მონაცემები 94 %-ს უტოლდება, ქალბატონებში - 82-ს.
მიღებული წყლის რაოდენობის გაზრდაში შემდეგი რჩევები დაგეხმარებათ:
- თითოეულ კვებაზე ერთ ჭიქამდე წყალი მაინც უნდა დალიოთ.
- წყალი ყოველთვის თან ატარეთ და მის შესანახად მრავალჯერადი გამოყენების ბოთლები გამოიყენეთ.
- ფიზიკური დატვირთვის დროს წყალი აუცილებლად დალიეთ.
- საწოლთან ახლოს ყოველთვის გედგათ წყლით სავსე ჭიქა.
- მიირთვით წყლით მდიდარი საკვები, როგორებიცაა წვნიანები და კოქტეილები.
- მიიღეთ დიდი რაოდენობით ხილი და ბოსტნეული, განსაკუთრებით საზამთრო, ნესვი, პომიდორი, სალათის ფურცელი, ნიახური და კიტრი.
წარმატებებს გისურვებთ!
