სტატია

აღმოაჩინე ჩვენი ბლოგი



როგორ მოვემზადოთ ინტერვალური შიმშილობისთვის?

ინტერვალური შიმშილობის რეჟიმის დაცვა ბევრ ადამიანს მარტივად ეჩვენა. თუ თქვენ გურმანი არ ხართ და დილით გაღვიძებისთანავე საკვებზე ფიქრს არ იწყებთ, შესაძლოა, ჩათვალოთ, რომ დროის გარკვეულ მონაკვეთში შიმშილი არ გაგიჭირდებათ. ადამიანების დიდი ნაწილი საუზმეს საერთოდ არ მიირთმევს და საჭმლის ჭამა მხოლოდ მაშინ ახსენდება, როდესაც ენერგია ეცლება ან კუჭის ტკივილი აწუხებს. როდესაც საკვებისადმი ნეიტრალური დამოკიდებულების ადამიანს ინტერვალური შიმშილობის შესახებ ესაუბრებით, ის თვლის, რომ მსგავსი რეჟიმის დაცვას მარტივად შეძლებს. თუ თქვენ ღამის საათებში საკვების მიღება გიყვართ და გათენებას მოუთმენლად ელით, რათა საუზმის მირთმევა შეძლოთ, შესაძლოა, ჩათვალოთ, რომ ინტერვალური შიმშილობა თქვენთვის სასარგებლო ან საჭირო მეთოდი არ არის. მიუხედავად ამისა, დასკვენის წინასწარ გამოტანისგან თავის შეკავებას გირჩევთ.

ინტერვალური შიმშილობის საწყისი ეტაპი საკმაოდ ბევრ სირთულესთან არის დაკავშირებული, თუმცა კვების ახალ რეჟიმთან შეგუების შემდეგ მათი გადალახვა მარტივდება. მთავარია, ინტერვალური შიმშილობის დასაწყებად სათანადოდ მოემზადოთ და იმ სპეციალური ტექნიკების შესახებ მოიპოვოთ ინფორმაცია, რომელთა დახმარებით საწყისი ეტაპის სიძნელეების დაძლევას მარტივად შეძლებთ.  შიმშილი კაცობრიობის ისტორიაში უპრეცედენტო მოვლენა ნამდვილად არ არის. საუკუნეების მანძილზე საკვების ნაკლებობის ან რელიგიური მისწრაფებების გამო ადამიანები აღნიშნული პრაქტიკით საკმაოდ ხშირად კავდებოდნენ.

თანამედროვე სამყაროში შიმშილობამ განსხვავებული დატვირთვა შეიძინა. ადამიანები ინტერვალურ შიმშილს ფორმაში ჩადგომის ან ჯანმრთელობის მდგომარეობის გაუმჯობესების მიზნით ძალიან ხშირად მიმართავენ. ზოგიერთი მათგანი 2 დღის განმავლობაში არაფერს მიირთმევს, შემდეგ კი გარკვეული დროის მანძილზე ჩვეულებრივად იკვებება.  ინტერვალური შიმშილის მიმდევრებს შორის ყველაზე პოპულარული 16:8 მეთოდია. თქვენ 8 საათიანი ფანჯარა გაქვთ. მოცემულ შუალედში თავისუფლად იკვებებით, ხოლო მომდევნო 16 საათის მანძილზე ჭამა გეკრძალებათ. როგორც წესი, მსგავი კვების რეჟიმი ჯანმრთელობის ზოგად მდგომარეობას აუმჯობესებს და ადამიანებს ახალგაზრდობის შენარჩუნებაში ეხმარება. წონაში დაკლება თუ გსურთ, უმჯობესია, ინტერვალური შიმშილის უფრო მკაცრ ფორმას მიმართოთ. მაგ. კვირაში 2 დღის მანძილზე მხოლოდ 500-600 კალორიის მიღება, ან კვებისთვის ნებადართულ ინტერვალებში მიღებული კალორიების რიცხვის შემცირება.

მიღებული კალორიების რიცხვის შემცირებით თქვენ წონაში დაკლების პროცესს დააჩქარებთ. კვლევებით დასტურდება, რომ ინტერვალური შიმშილობა ზრდის ჰორმონის გამომუშავებას უწყობს ხელს, გარდა ამისა ის მეტაბოლიზმის დაჩქარებასაც ასტიმულირებს, რაც თავის მხრივ ცხიმის წვის პროცესს ააქტიურებს. ინტერვალურ შიმშილს ადამიანის გუნება-განწყობის გაუმჯობესების უნარიც შესწევს. თუ 24 საათიან შიმშილობას აირჩევთ, აღნიშნული მეთოდის ერთგულება ძალიან გაგიჭირდებათ. უკეთესი შედეგების მისაღებად, უმჯობესია, თუ უპირატესობას 16:8 მეთოდს მიანიჭებთ. შეგიძლიათ, პირველი კვება ლანჩის დროს დაამთხვიოთ. შუადღის 1 საათიდან საღამოს 9 საათამდე კვების ფანჯარა შიმშილობის ატანას გაგიადვილებთ. თუ საუზმის მირთმევას მიჩვეული ხართ, შესაძლოა, მსგავსი რეჟიმით კვება ძალიან გაგიჭირდეთ. ადამიანები, რომლებიც ინტერვალურ შიმშილობას იწყებენ, ხშირად აღნიშნავენ, რომ კვების ახალ რეჟიმთან შეგუება ძალიან უჭირთ. თავდაპირველად თქვენ ყოველწამიერად საჭმელზე იფიქრებთ. შესაძლოა, კვების ფანჯარა მთლიანად აითვისოთ და მოცემულ ინტერვალში იმაზე მეტი მიირთვათ, ვიდრე ეს სასურველია. უმჯობესია, თუ დასაწყისისთვის 16:8 მეთოდს მხოლოდ გარკვეულ დღეებში მიმართავთ, ხოლო დანარჩენ დროს კვების ჩვეულ რეჟიმს დაიცავთ. აღნიშნული მიდგომა ინტერვალური შიმშილობის რეჟიმზე უმტკივნეულოდ გადასვლაში ძალიან დაგეხმარებათ.

კვების ჩვეული რეჟიმის დარღვევა თავდაპირველად გარკვეულ უსიამოვნებებს გამოიწვევს. შესაძლოა, თავის ტკივილმა და სისუსტის შეგრძნებამ შეგაწუხოთ, თუმცა აღნიშნული სიმპტომების გადალახვა მარტივად შეგიძლიათ. მათ გამო ადვილად არ უნდა დანებდეთ. ინტერვალური შიმშილობის რეჟიმის სრულფასოვნად დაცვა თუ გსურთ, აუცილებლად წინასწარ მოიმზადეთ და მოიმარაგეთ საკვები. წინააღმდეგ შემთხვევაში, თქვენ კვების ახალ რეჟიმს მოუმზადებელი შეხვდებით. დამწყებები ხშირად ერთსა და იმავე შეცდომას უშვებენ. ისინი სამსახურში წასაღებად მცირე ულუფებს იმზადებენ, შემდეგ კი აღმოაჩენენ, რომ მომარაგებული საკვები კვების ფანჯრის გახსნიდან მის დახურვამდე საკმარისი არ არის. კალორიების დეფიციტის გამო ისინი შიმშილობის ინტერვალის დროს განსაკუთრებულად გაღიზიანებულები არიან და კვების ინტერვალს მოუთმენლად ელიან. ისინი ცდილობენ დანაკარგი მაქსიმალურად აინაზღაურონ და კვების ფანჯრის გახსნისას თავს სხვადასხვაგვარი ტკბილეულით ან ხემსით ისაჩუქრებენ.

შიმშილობის დაწყებამდე ყველა შესაძლო ვითარება უნდა განსაზღვროთ, რომელიც რეჟიმის დაცვაში პოტენციურ ხელისშემშლელად შეიძლება მოგევლინოთ. ეცადეთ, ცვლილებებს მომზადებული შეხვდეთ, რათა ზედმეტი სტრესის ან უსიამოვნებების თავიდან აცილება შეძლოთ. კვებითი ჩვევების გადახალისების და წარმატებით შეცვლის მთავარი საწინდარი კარგი დაგეგმვა და აღნიშნული ცვლილებების სიღრმისეული გაანალიზებაა. განსაზღვრულ დროს  საჭირო საკვების მირთმევა და არასასურველი პროდუქტებისთვის თავის არიდება ახალ რეჟიმზე გადასვლის ყველაზე კარგი საშუალებებია. აუცილებელია, რომ დღის განმავლობაში მისაღები საკვები წინასწარ მოიმზადოთ. მართალია, მომზადებას საკმაოდ დიდი დრო მიაქვს, მაგრამ ამგვარად ფინანსების დაზოგვასაც შეძლებთ და  კვების რეჟიმსაც სრულფასოვნად დაიცავთ. თუ საკვებს წინასწარ არ მოამზადებთ, შესაძლოა, კალორიების სათანადო რაოდენობით მიღება ვერ შეძლოთ, ან იმაზე მეტი მიირთვათ, ვიდრე საჭიროა. გახსოვდეთ, რომ წარმატების მისაღწევად თქვენი ყოველდღიური კვების რეჟიმის ორგანიზებაზე ზრუნვა აუცილებლად დაგჭირდებათ.

საკვების წინასწარ მომზადება მის მიმართ დამოკიდებულებას მნიშვნელოვნად შეგიცვლით. თავდაპირველად თქვენ ძალიან მოგენატრებათ ის პროდუქტები, რომელთაც რეგულარულად მიირთმევდით, ხშირად იოცნებებთ ცხელი კერძების მირთმევასა და ტკბილეულის დაგემოვნებაზე. როდესაც კვების რეჟიმის ორგანიზება თქვენს ჩვეულ რუტინად იქცევა, აღმოაჩენთ, რომ ძალიან ბევრს ფიქრობთ და გაინტერესებთ, რას ჭამთ. როგორც წესი, ადამიანები ჩიფსების ჭამას ორი დღით ადრე არ გეგმავენ, ისინი მსგავს გადაწყვეტილებებს სპონტანურად იღებენ. კვების სპონტანური რეჟიმიდან მოწესრიგებულ რუტინაზე გადასვლა საკვებისადმი თქვენს დამოკიდებულებას შეცვლის. ადამიანების ძალიან დიდი ნაწილი ამტკიცებს, რომ ისინი ინტერვალური შიმშილის დროს კვებისგან გაცილებით მეტ სიამოვნებას იღებენ, ვიდრე ჩვეულებრივ დღეებში. როდესაც აცნობიერებთ, რომ მომდევნო კვებამდე დროის საკმაოდ დიდი შუალედია, კერძს სიამოვნებით მიირთმევთ.

ინტერვალური შიმშილობის დაწყება ორგანიზმისთვის გარკვეულ სტრესთან არის დაკავშირებული. როდესაც ორგანიზმი დღიურად იმაზე ნაკლებ კალორიას იღებს, ვიდრე ჩვეულებრივ, ენერგია მნიშვნელოვნად იკლებს, სექსუალური ლტოლვაც ნელდება და გარკვეული დროით ტვინის ფუნქციონირებაც ფერხდება. კვლევებით დასტურდება, რომ უმზომზე ვარჯიშს თავისი უპირატესობები აქვს. როგორც წესი, ინტერვალური შიმშილობის პარალელურად ფიზიკური აქტივობით დაკავება ცხიმის წვის მაჩვენებლებს მნიშვნელოვნად ზრდის. ინტერვალური შიმშილობა ძალიან სასარგებლოა იმ ადამიანებისთვის, რომლებსაც დილის ვარჯიშები იზიდავთ. საღამოს ვარჯიშის მოყვარულებმა დატვირთვამდე საკვები აუცილებლად უნდა მიიღონ. ვარჯიში კი კვების ფანჯრის დახურვამდე უნდა დაასრულონ, რათა დატვირთვის შემდეგ საჭირო კალორების მიღება შეძლონ. შიმშილობის დაწყებიდან გარკვეული დროის გასვლის შემდეგ თავის ტკივილი მოიკლებს, თქვენ საუზმის გამოტოვება გაგიმარტივდებათ და ღამის საათებში ჩუმად ჭამის მოთხოვნილებაც აღარ შეგაწუხებთ. როგორც ყველა სხვა კვების რეჟიმი, ინტერვალური შიმშილობაც რუტინის ჩამოყალიბებას მოითხოვს, რის შემდეგაც მისი ერთგულება საკმაოდ მარტივია.

კვების ახალ რეჟიმთან შეგუების შემდეგ თქვენ ენერგია სწრაფად დაგიბრუნდებათ. 16:8 მეთოდის გამოყენებისას წონაში სწრაფად ვერ დაიკლებთ, თუმცა მისი დახმარებით ჯანსაღი კვებითი ჩვევების ჩამოყალიბებას მარტივად შეძლებთ, გარდა ამისა, ინტერვალური შიმშილობის დროს ღამით ჭამის მავნე ჩვევასაც დაივიწყებთ. თქვენ საკვების წინასწარ მომზადებას მიეჩვევით, რაც კვების რეჟიმის ორგანიზებაში დაგეხმარებათ. ინტერვალური შიმშილობის პოპულარობა დროსთან ერთად იმატებს. საკვების მიღების გარეშე ცხოვრება საკმაოდ არაკომფორტულია, თუმცა როდესაც ახალ რეჟიმს ეჩვევით, აცნობიერებთ, რომ საკუთარი საკვები რაციონის მოწესრიგებაზე მეტად ხართ ორიენტირებული და კვების ახალი მეთოდის გამოყენებით მიღებული სარგებელი თვალსაჩინო ხდება. თქვენ თავს გაცილებით ჯანსაღად და თავდაჯერებულად გრძნობთ. თქვენი დღის რეჟიმი მოწესრიგებულია და ვარჯიშისგანაც იმაზე მეტ სარგებელს იღებთ, ვიდრე ოდესმე. თუ ინტერვალური შიმშილობის პირველ ეტაპს არ შეუშინდებით და კვების ახალ რეჟიმს სათანადოდ უერთგულებთ, მიღებული შედეგით ნამდვილად კმაყოფილი დარჩებით.

წარმატებებს გისურვებთ!

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა