სტატია

აღმოაჩინე ჩვენი ბლოგი



სახლში ვარჯიშისას დაშვებული შეცდომები და მათი თავიდან აცილების გზები

ადამიანების უდიდესი ნაწილი პანდემიის გამო სახლში ვარჯიშობს. სავარჯიშო დარბაზების დახურვამ მოყვარულ ათლეტებს მათთვის საინტერესო ინფორმაციის ონლაინ რეჟიმში მოძიებისკენ უბიძგა. ადამიანები Youtube არხებისა და ინსტაგრამის დახმარებით ცდილობენ მათზე მორგებული სავარჯიშო რუტინის შემუშავებას. ისინი ცნობილი და პოპულარული ფიტნეს ვარსკვლავების ან მოყვარული ათლეტების გამოცდილებას იზიარებენ, მათ რჩევებს ითვალისწინებენ და მათი აქტიური მიმდევრებიც ხდებიან. სავარჯიშო რუტინის სწორად შერჩევა სახლის პირობებში ვარჯიშისას შეცდომების დაშვებას არ გამორიცხავს. შესრულების სწორი ტექნიკის ცოდნა აუცილებელია, რადგან ტრავმებისა და დაზიანებების მიღების ალბათობა სახლში ვარჯიშის დროს გაცილებით მაღალია, ვიდრე დარბაზში დატვირთვისას. შეცდომებისგან დაზღვეული არავინაა, თუმცა მათი იდენტიფიცირება, გამოსწორება ან თავიდან არიდება საჭირო ინფორმაციისა და ცოდნის მოპოვების გზით სავსებით შესაძლებელია. ჩვენს სტატიაში იმ გავრცელებულ შეცდომებს გაგაცნობთ, რომლებსაც ადამიანები სახლის პირობებში ვარჯიშის დროს ყველაზე ხშირად უშვებენ.

  • ინსტაგრამზე პოპულარული ადამიანების ბრმად მინდობა

ყველა ფიტნეს ინსტრუქტორი ერთმანეთის მსგავსი არ არის. თუ თქვენ გამოცდილება არ გაქვთ და ფორმაში ჩადგომაზე აქამდე არასდროს გიზრუნიათ, ინსტაგრამზე პოპულარული ათლეტების ან ინსტრუქტორებისადმი ზედმეტი ნდობის გამოცხადებას არ გირჩევთ. თანამედროვე სამყაროში არც ისე იშვიათია, როდესაც ადამიანები ბრმად ენდობიან სოციალურ ქსელებში პოპულარულ ათლეტებს, რომლებსაც კარგი მარკეტინგული უნარები აქვთ, მაგრამ ფიტნეს გამოცდილებით არ გამოირჩევიან. ფიტნესში, ისევე როგორც მედიცინაში, მსგავსი შემთხვევები ხშირია. კარგი მარკეტინგის წყალობით თვითგამოცხადებული ექიმები ხშირად უამრავ მიმდევარს იძენენ. მათ სამედიცინო ხარისხი არ აქვთ, მაგრამ სხვების დარწმუნების უნარით ნამდვილად გამოირჩევიან. ისინი ადამიანებს უმტკიცებენ, რომ მათი მძიმე დაავადებებისგან განკურნვა შეუძლიათ, რისთვისაც ხშირად ჰომეოპათიურ მედიცინას მიმართავენ. ადამიანებს მათი რჩევები სარწმუნოდ მიაჩნიათ და მსგავსი „ექიმების“ რეკომენდაციებს ბრმად იცავენ, რადგან ისინი პაციენტებს მკურნალობის მარტივ მეთოდებს სთავაზობენ. ადამიანების უდიდეს ნაწილს მიზნის მისაღწევად მარტივი გზის გავლა ურჩევნია, რის გამოც ხშირად მათი მცდელობა კრახით სრულდება. დამწყები ათლეტები ასეთ შეცდომებს ფიტნესშიც ხშირად უშვებენ. გირჩევთ, ბრმად არავის ენდოთ. ნებისმიერი ინფორმაცია გადაამოწმეთ. მიზნის მისაღწევად მარტივი გზა არასდროს აირჩიოთ. გახსოვდეთ, ინსტაგრამის ვარკვლავებისადმი უპირობო ნდობის გამოვლენა უდიდესი შეცდომაა.

  • ერთი და იმავე ვარჯიშის ძალიან ხშირად გამეორება

თქვენი სხეული ერთი და იმავე ვარჯიშის ძალიან ხშირად შესრულებით სარგებელს ვერ ნახავს. შესაძლოა, ყველაფერი პირიქით მოხდეს. მიზნის მისაღწევად სხვადასხვა სახის სტიმული უნდა გამოიყენოთ. მჯდომარე ცხოვრების სტილის საპირწონედ მრავალფეროვანი და საინტერესო რუტინის გამოყენება აუცილებელია. თქვენს რუტინაში ძალისმიერი, მოქნილობის, სისწრაფისა და ამტანობის გასაძლიერებელი ვარჯიშების ჩართვა გაცილებით უკეთეს შედეგებს მოგცემთ, ვიდრე ყოველდღიურად ერთი და იმავე მოძრაობების შესრულება. კუნთების გარკვეული ჯგუფის რეგულარული დატვირთვა პროპორციის დარღვევას იწვევს. თუ ყოველდღიურად ერთსა და იმავე კუნთებს გაავარჯიშებთ, საბოლოო ჯამში, დიდი პრობლემის წინაშე აღმოჩნდებით, რადგან თქვენი სხეული ჰარმონიულ წყობას დაკარგავს. მსგავსი გართულებების თავიდან ასაცილებლად, უმჯობესია, თუ რუტინას მაქსიმალურად გაამრავალფეროვნებთ.

  • შესაძლებლობების ზღვარს მიღმა ვარჯიში

თქვენ საკუთარ შესაძლებლობებში კარგად უნდა ერკვეოდეთ. აუცილებლად უნდა იცოდეთ, რისი გაკეთება შეგიძლიათ ან რა სახის დატვირთვას ვერ გაუძლებთ. ეფექტური ვარჯიშისთვის გულისცემის მონიტორის გამოყენებას გირჩევთ. აუცილებლად გაარკვიეთ,  გულისცემის რა მაჩვენებელი ითვლება ნორმალურად თქვენი სქესის, ასაკისა და ჯანმრთელობის მდგომარეობის მქონე ადამიანებისთვის. რა თქმა უნდა, გულისცემის მაჩვენებლები მოსვენებულ მდგომარეობაში განსხვავებულია, ხოლო ვარჯიშის დროს იმატებს. ეცადეთ, შესაძლებლობების მაქსიმალურ ზღვარს არ გადასცდეთ. მართალია, ზედმეტი დატვირთვით ვარჯიში საზიანოა, თუმცა არც სიზარმაცე გარგებთ. აუცილებელია, რომ თქვენი შესაძლებლობები და პოტენციალი მაქსიმალურად გამოიყენოთ.

  • ძალების აღდგენაზე უარის თქმა

ნებისმიერი ვარჯიშის შემდეგ ძალების აღდგენა აუცილებელია. კუნთოვანი ქსოვილი და ძვლოვანი მასა დატვირთვის შემდგომ აღდგენას საჭიროებს, რათა თქვენმა სხეულმა ნორმალურად ფუნქციონირება შეძლოს. თქვენ საკუთარი ორგანიზმის საერთო მდგომარეობის სწორად შეფასება უნდა შეგეძლოთ. თუ ვარჯიშის შემდეგ საკმარისად არ დაისვენებთ და დაღლილობის მიუხედავად ვარჯიშს ყოველდღიურად განაგრძობთ, საბოლოოდ ტრავმას ან დაზიანებას მიიღებთ. თუ ფიტნესში სათანადოდ დახელოვნებული არ ხართ, ვარჯიშის დროს შემდეგი პრინციპით იხელმძღვანელეთ: ერთი დღე მსუბუქი დატვირთვა, ერთი დღე დასვენება, ერთი დღე სრული დატვირთვა, ერთი დღე დასვენება. კარგ ფორმაში თუ ხართ, ორი დღე სრული დატვირთვით ივარჯიშეთ, ერთი დღე დასვენებას დაუთმეთ. პროფესიონალი ათლეტი თუ ხართ ან რეგულარულად ვარჯიშობთ, შეგიძლიათ 3-4 დღე ვარჯიშს დაუთმოთ, შემდეგ 1 დღით დაისვენოთ.

  • ვარჯიშის გახურების გარეშე დაწყება

ნებისმიერი ვარჯიშის დაწყებამდე გახურება აუცილებელია. პროფესიონალი ფიტნეს ინსტრუქტორების დიდი ნაწილი თვლის, რომ გახურებას დაახლოებით 10 წუთი მაინც უნდა დაუთმოთ. გახურება ვარჯიშისთვის მომზადებაში გეხმარებათ. ის დაზიანებების და ტრავმების მიღებისგან გიცავთ, გარდა ამისა, მისი დახმარებით დატვირთვისგან მაქსიმალური სარგებლის მიღებასაც შეძლებთ. ვარჯიშის ხანგრძლივობას მნიშვნელობა არ აქვს. შესაძლოა, დატვირთვას დღეში მხოლოდ 30 წუთს უთმობდეთ და ჩათვალოთ, რომ გახურება არ გჭრიდებათ, რაც შეცდომაა. ხანმოკლე ვარჯიშის დაწყებამდეც აუცილებლად უნდა გახურდეთ. თუ გახურების სპეციალური რუტინა არ გაქვთ, თქვენი ვარჯიშის პირველი რაუნდი შედარებით მსუბუქი ვარჯიშებისგან უნდა შედგებოდეს, რათა ორგანიზმმა სრულფასოვანი დატვირთვისთვის მომზადება შეძლოს.

  • გაწელვის ვარჯიშების მნიშვნელობის გადაჭარბებულად შეფასება

გაწელვა თქვენი ორგანიზმისთვის ძალიან სასარგებლოა, თუმცა ის ყველა პრობლემის მოგვარებაში ვერ დაგეხმარებათ. ადამიანები თვლიან, რომ გაწელვით ნებისმიერი სახის ტრავმის ან ტკივილის განკურნება შეიძლება, რაც შეცდომაა. თუ სათანადოდ არ მოძრაობთ, მხოლოდ გაწელვის ვარჯიშების წყალობით ქსოვილებისთვის სიმკვრივის დაბრუნებას ვერ შეძლებთ. კუნთები, მყესები და იოგები მოქნილობას სწორედ მოძრაობის წყალობით იძენენ. აქტიურ და მოძრავ ადამიანებს დატვირთვის დროს სხეულის სხვადასხვა ნაწილში სიმძიმისა და ტკივილის შეგრძნებები ნაკლებად აწუხებთ, რადგან ისინი მოქნილები არიან. იმისთვის, რომ ელასტიური იყოთ, პირველ რიგში, ძალიან ბევრი უნდა იმოძრაოთ. გაწელვის ვარჯიშების შესრულებას მხოლოდ იმ შემთხვევაში აქვს აზრი, თუ სხეულს სათანადოდ ტვირთავთ. სხვა შემთხვევაში, სასურველი შედეგის მიღებას ვერ შეძლებთ.

  • ვარჯიშის დროს ტელევიზორის ან მობილურის ეკრანის ყურება

ვარჯიშის დროს ნებისმიერი სახის გასართობი აუცილებლად უნდა დაივიწყოთ. ტელევიზორი გამორთეთ, მობილური კი თვალთახედვის არიდან გააქრეთ, რათა ყურადღება არ გაგეფანტოთ და ვარჯიშზე კონცენტრირება შეძლოთ. როდესაც რამდენიმე საქმის ერთდროულად გაკეთებას ცდილობთ, თქვენი მცდელობა ხშირად კრახით სრულდება. თუ გსურთ, პროდუქტიული იყოთ და დატვირთვისგან მაქსიმალური სარგებელი მიიღოთ, მთელი ყურადღება ვარჯიშზე გადაიტანეთ, სხვა გასართობები კი დროებით დაივიწყეთ.

  • დამღლელ ვარჯიშებზე უარის თქმა

ადამიანების ნაწილი დამღლელ ვარჯიშებზე უარს ამბობს, რადგან მას მოსაწყენად ან სახიფათოდ მიიჩნევს. თუ დატვირთვის დროს ფიზიკურ ტკივილს ან მეტისმეტად უსიამოვნო შეგრძნებებს განიცდით, ვარჯიშზე უარი უნდა თქვათ, რადგან ამ შემთხვევაში ტრავმების მიღების ალბათობა საკმაოდ დიდია. დატვირთვა მტკივნეული არ უნდა იყოს. როგორც კი ტკივილს იგრძნობთ, ვარჯიში თქვენი რუტინიდან ამოიღეთ და სხვა მოძრაობების შესრულებაზე გადაინაცვლეთ. დაღლის შეგრძნება ვარჯიშზე უარის თქმის მიზეზი არ უნდა იყოს. იმ შემთხვევაშიც კი, როდესაც მტკივნეულ ვარჯიშზე უარს ამბობთ, ეს დანებებას არ უნდა უდრიდეს. თქვენ მოცემულ ვარჯიშზე უარი მხოლოდ დროებით უნდა თქვათ. სამომავლოდ, როდესაც უკეთეს ფიზიკურ ფორმაში იქნებით, მას აუცილებლად უნდა დაუბრუნდეთ. გახსოვდეთ, მარტივად დანებება და სირთულეებისთვის თავის არიდება სასურველ შედეგამდე ვერ მიგიყვანთ.

წარმატებებს გისურვებთ!

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა