სტატია

აღმოაჩინე ჩვენი ბლოგი



ანაბოლური ჰორმონების კონცენტრაციის ზრდა ბუნებრივი მეთოდებით

კუნთოვანი მასის ზრდა თუ გსურთ, ოთხი მნიშვნელოვანი ფაქტორი უნდა გაითვალისწინოთ: კუნთები სათანადოდ უნდა დატვირთოთ, ძალების აღდგენას საკმარისი დრო უნდა დაუთმოთ, სწორად უნდა იკვებოთ და ჰორმონალური ფონი მოიწესრიგოთ. თქვენი სხეული ანაბოლური ჰორმონების მიერ კონტროლდება. შესაძლოა, ფიქრობდეთ, რომ ყველაფერი თქვენი ცხოვრების სტილზეა დამოკიდებული, მაგრამ ასე არ არის. ჰორმონებს სხეულის კომპოზიციის ჩამოყალიბებაში ძალიან მნიშვნელოვანი როლი ეკისრება. კუნთოვანი მასის ზრდას ხელს სამი სახის ანაბოლური ჰორმონი უწყობს, ესენია: ტესტოსტერონი, ინსულინი და ზრდის ჰორმონი. მათი ერთობლიობა განაპირობებს რამდენად სწრაფად შეგიძლიათ კუნთოვანი მასის მატება. როდესაც ჰორმონები წესრიგში გაქვთ, ნელი და თანდათანობითი პროგრესი სწრაფ და ეფექტურ პროგრესად გარდაიქმნება, თქვენი კუნთები მოულოდნელად იწყებს ზრდას და განვითარებას. ჩვენს სტატიაში შემოგთავაზებთ ბუნებრივ მეთოდებსა და საშუალებებს, რომელთა დახმარებით თითოეული ანაბოლური ჰორმონის გამომუშავებას შეუწყობთ ხელს და მათ მოცულობას მნიშვნელოვნად გაზრდით.

რომელი ბუნებრივი მეთოდების გამოყენებაა ეფექტური ტესტოსტერონის დონის გასაზრდელად?

ტესტოსტერონის დონის გასაზრდელად ერთ-ერთი ყველაზე ეფექტური საშუალება ამინომჟავა გლუტამინის მიღებაა. ათლეტები მას აქტიურად იღებენ, რათა იმუნური სისტემა გააძლიერონ და ორგანიზმში კატაბოლური რეაქციები შეამცირონ. ეს ყოველივე ძალის მატებას განაპირობებს და კუნთოვანი მასის ზრდასაც უწყობს ხელს. ერთ-ერთი კვლევის თანახმად, ამინომჟავა გლუტამინის მიღება ზრდის ჰორმონის გამომუშავებასაც აჩქარებს. გლუტამინისგან მაქსიმალური სარგებლის მიღება თუ გსურთ, იდეალურია, თუ მას, ვარჯიშის შემდგომ პროტეინის კოქტეილთან ერთად ან ძილის წინ მიიღებთ. ტესტოსტერონის დონის ზრდას ხელს მაღალი ინტენსივობის ინტერვალური ვარჯიშების შესრულებაც უწყობს. კვლევებით დასტურდება, რომ ინტერვალურ ვარჯიშს ორგანიზმისთვის ძალიან ბევრი სარგებელი მოაქვს, ერთ-ერთია ზრდის ჰორმონის გამომუშავების ხელშეწყობა. თუ ტესტოსტერონის დონის გაზრდა გსურთ, შეგიძლიათ მაღალი ინტენსივობის ინტერვალური ვარჯიშები დღეგამოშვებით შეასრულოთ. 

თანამედროვე სამყაროში ნაჯერი ცხიმების მიღების წინააღმდეგ აქტიური პროპაგანდა მუშაობს, მიუხედავად ამისა, გირჩევთ, რომ ტესტოსტერონის დონის მატების მიზნით მათზე უარი არ თქვათ. ეს სულაც არ გულისხმობს იმას, რომ საუზმეზე კვერცხი, ბეკონი და კარაქი მიირთვათ. მთავარია, რომ რაციონიდან ნაჯერი ცხიმები სრულად არ გამორიცხოთ. კვლევებით დასტურდება, რომ მამაკაცებს, რომლებიც ნაჯერ ცხიმებს აქტიურად იღებენ, ხოლო დიეტურ ბოჭკოვან პროდუქტებს ნაკლებად მიირთმევენ, ორგანიზმში ტესტოსტერონის გაცილებით მაღალი შემცველობა აქვთ, ვიდრე იმ მამაკაცებს, რომლებიც ცხიმების მიღებას თავს არიდებენ და უპირატესობას უჯრედისით მდიდარ საკვებს ანიჭებენ. ამასთან, ეს იმას არ გულისხმობს, რომ უჯრედისზე უარი თქვათ. მთავარია, რომ ნაჯერ ცხიმებსა და ბოჭკოს შორის ბალანსის დაცვა შეძლოთ. ნაჯერი ცხიმები ნატურალური პროდუქტების სახით უნდა მიიღოთ, როგორებიცაა რძის ნაწარმი, ღორისა და საქონლის ხორცი ან ქოქოსის ზეთი.

ტესტოსტერონის დონის მატებისთვის მნიშვნელოვანია სტრესის შემცირებაც. სტრესი ორგანიზმში კორტიზოლის გამომუშავებას უწყობს ხელს, რომელიც კატაბოლური ჰორმონია. კვლევებით დგინდება, რომ 33-დან 55 წლამდე მამაკაცებს, რომლებიც სტრესს რეგულარულად განიცდიან, სისხლში ტესტოსტერონის დაბალი კონცენტრაცია აქვთ. რაც უფრო ნაკლებად სტრესულ გარემოში იმყოფებით, თქვენს ორგანიზმში ტესტოსტერონი გაცილებით მაღალი დოზითაა. გარდა ამისა, ანაბოლური ჰორმონების ბალანსირებისთვის ძილს გადამწყვეტი მნიშვნელობა აქვს. თუ არასაკმარისად გძინავთ, ტესტოსტერონის დონის დაქვეითების პრობლემა აუცილებლად შეგაწუხებთ. კვლევებით დასტურდება, რომ ადამიანებს, რომლებსაც დღე-ღამეში მხოლოდ 5 საათი სძინავთ, ტესტოსტერონის მაჩვენებელი 10-15%-ით დაბალი აქვთ, ვიდრე იმ ადამიანებს, რომლებიც ძილს 8 საათს მაინც უთმობენ. ტესტოსტერონის დონის ზრდას თუთიით მდიდარი პროდუქტების მიღებაც უწყობს ხელს. მამაკაცები ეაკულაციის დროს ორგანიზმიდან თუთიას კარგავენ. თუ თქვენ აქტიურ სექსუალურ ცხოვრებას ეწევით, გირჩევთ თუთიით მდიდარი პროდუქტები ხშირად მიიღოთ. უპირატესობა იოგურტს, ცხვრის ხორცს, გოგრის თესლსა და ხამანწკებს მიანიჭეთ.

რომელი ბუნებრივი მეთოდებისა და საშუალებების გამოყენებაა ეფექტური ზრდის ჰორმონის კონცენტრაციის მატებისთვის?

ზრდის ჰორმონის კონცენტრაციის მატებისთვის ერთ-ერთი საუკეთესო საშუალება ამინომჟავა არგინინია. აღნიშნული ამინომჟავა ზრდის ჰორმონის მატებას მაშინაც უწყობს ხელს, როდესაც თქვენ მოსვენებულ მდგომარეობაში ხართ. თუ არგინინის მიღებასთან ერთად ვარჯიშობთ კიდეც, პროგრესი მარტივად შესამჩნევი იქნება, რაც არაერთი კვლევით არის დადასტურებული. არგინინის დახმარებით კუნთოვანი ქსოვილის ჟანგბადითა და სისხლით მომარაგების პროცესი აქტიურდება. კიდევ ერთი გზა, რომელიც ზრდის ჰორმონის კონცენტრაციის მატებაში დაგეხმარებათ კომედიური ფილმების ყურებაა. კვლევებით დასტურდება, რომ სიცილის დროს ორგანიზმში ბეტა-ენდორფინებისა და ზრდის ჰორმონის დონე მნიშვნელოვნად მატულობს. თუ გავითვალისწინებთ იმ ფაქტს, რომ სტრესი კორტიზოლის გამომუშავებას უწყობს ხელს, რომელიც ზრდის ჰორმონის საპირისპიროდ მოქმედი ჰორმონია, სულაც არ არის გასაკვირი, რომ სიცილი ზრდის ჰორმონის კონცენტრაციის მატებისთვის არის სასარგებლო. გარდა ამისა, ზრდის ჰორმონის გამომუშავების გასააქტიურებლად მუქი შეფერილობის მქონე ხილისა და ბოსტნეულის მირთმევაც რეკომენდებულია. მსგავსი პროდუქტები ძალიან მდიდარია C ვიტამინით, რომელიც ზრდის ჰორმონის კონცენტრაციის მატებას უწყობს ხელს. კვლევებით დასტურდება, რომ ორგანიზმში С ვიტამინის დეფიციტი ზრდის ჰორმონის დონის მნიშვნელოვან დაქვეითებას იწვევს.

რომელი ბუნებრივი მეთოდებისა და საშუალებების გამოყენებაა ეფექტური ინსულინის დონის მატებისთვის?

ინსულინის დონის მატებისთვის ძალიან სასარგებლოა ვარჯიშის შემდეგ მაღალნახშირწყლოვანი პროდუქტების მიღება, როგორებიცაა ბაგელი, პური, მაკარონი. თუ ნახშირწყლები კვების რაციონიდან გამორიცხული არ გაქვთ, უმჯობესია, თუ მათ ფიზიკური დატვირთვის შემდეგ მიიღებთ. როდესაც არ ვარჯიშობთ, ეცადეთ ინსულინის დონე ორგანიზმში სტაბილურად შეინარჩუნოთ. ამგვარად თქვენი ორგანიზმი ნახშირწყლებს ენერგიის წყაროდ გამოიყენებს და ჭარბი ცხიმების დაგროვებისგანაც მეტად დაცული იქნებით. იმისთვის, რომ ნახშირწყლების ენერგიის წყაროდ გამოყენებას შეუწყოთ ხელი, უმჯობესია დღის განმავლობაში ნახშირწყლები ცილებთან და დიეტურ ცხიმებთან კომბინაციაში მიირთვათ. მართალია, კუნთოვანი მასის ზრდის მსურველებს ნახშირწყლების მიღება ესაჭიროებათ, მაგრამ არა შეუზღუდავი რაოდენობით. გახსოვდეთ, როდესაც ჭარბი რაოდენობით კალორიებს იღებთ, ისინი ნებისმიერ შემთხვევაში ცხიმების დაგროვებას გამოიწვევენ. აუცილებლად შეამოწმეთ, რა რაოდენობით ნახშირწყლებს იღებთ ყოველდღიურად. თუ მათ მირთმევას უკონტროლოდ განაგრძობთ, კუნთოვანი მასის მატებას ვერ შეძლებთ.

ინსულინის მიმართ სენსიტივობა, რაც გულისხმობს თქვენი ორგანიზმის მგრძნობელობას პანკრეასის მიერ გამომუშავებული ინსულინის ჰორმონისადმი, მნიშვნელოვან ზეგავლენას ახდენს ჭარბი ცხიმების დაგროვების პროცესზე. რაც უფრო მაღალია ინსულინის მიმართ სენსიტივობა, მით უფრო აქტიურად გამოიყენება ნახშირწყლები კუნთოვანი მასის ზრდისთვის და არ ხდება ჭარბი ცხიმების დაგროვება. ინტენსიური ფიზიკური დატვირთვა, განსაკუთრებით, წონებით ვარჯიში, ძალიან დადებით გავლენას ახდენს ინსულინის მიმართ სენსიტივობის ზრდაზე, რის გამოც გირჩევთ აღნიშნული ტიპის ვარჯიშებით ხშირად დაკავდეთ. ინსულინის გამომუშავებაზე დადებითად მოქმედებს დარიჩინის მიღებაც. ეცადეთ, ნახშირწყლებით გამდიდრებულ საკვებში დარიჩინი ხშირად დაამატოთ. ძალიან კარგია, თუ დარიჩინს დილით მომზადებულ შვრიის ფაფაში შეურევთ, ან მოხარშულ ტკბილ კარტოფილთან ერთად მიიღებთ. როდესაც ნახშირწყლებს დარიჩინს ამატებთ, თავს გაცილებით მსუბუქად გრძნობთ, ვიდრე ჩვეულებრივ.

როგორც ხედავთ, ანაბოლური ჰორმონების გასააქტიურებლად მრავალი ბუნებრივი მეთოდი და საშუალება არსებობს, რომელთა გამოყენება რთული არ არის. თუ ანაბოლური ჰორმონების დონეს დაასტაბილურებთ, შეგიძლიათ დარწმუნებული იყოთ, რომ კუნთოვანი მასის ზრდის სტიმულირებას შეძლებთ. მთავარია, კუნთები შესაბამისად დატვირთოთ და რეგულარულად ივარჯიშოთ. მნიშვნელოვანია, იცოდეთ, რომ სამივე ანაბოლური ჰორმონი უდიდეს ზეგავლენას ახდენს თქვენი კუნთოვანი მასის ფორმირებაზე, შესაბამისად, სამივე მათგანის დონის ზრდაზე თანაბრად უნდა იზრუნოთ. თუ რომელიმე მათგანის დონე ორგანიზმში ზღვარზე ნაკლებია, კუნთოვანი მასის ზრდის პროცესი მნიშვნელოვნად ფერხდება.

წარმატებებს გისურვებთ!

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა