სტატია

აღმოაჩინე ჩვენი ბლოგი



როგორ შევწყვიტოთ ღამით ჭამა - 10 ეფექტური მეთოდი

ადამიანების უდიდეს ნაწილს ღამის საათებში ჭამა ძალიან უყვარს. ღამით ისინი გაცილებით მეტ კალორიას იღებენ, ვიდრე ესაჭიროებათ, რაც საბოლოო ჯამში წონის მატებას უწყობს ხელს. თუ თქვენ ერთ-ერთი მათგანი ხართ, გირჩევთ ყურადღებით გაეცნოთ ჩვენს სტატიას. გვიან საღამოს ან ღამის საათებში კვებისგან თავის შეკავებას აუცილებლად შეძლებთ, თუ გარკვეულ სტრატეგიებსა და ხრიკებს გამოიყენებთ.

  • ღამის საათებში მადის გაძლიერების რეალური მიზეზი დაადგინეთ

ადამიანების ნაწილი ყველაზე მეტ კალორიას სწორედ საღამოს ან ღამის საათებში იღებს. ამ მავნე ჩვევის თავიდან ასაცილებლად, მათ პრობლემის რეალური მიზეზი უნდა გამოიკვლიონ. ღამის საათებში კვება ძირითადად დღის მანძილზე კალორიების უმნიშვნელო რაოდენობის მიღებითაა გამოწვეული. ადამიანები დღის საათებში ცოტას მიირთმევენ, რის გამოც საღამოს მადა ძალიან უძლიერდებათ. ზოგჯერ ისინი ღამე მოწყენილობის გამო ჭამენ. ზოგჯერ ღამის საათებში კვება კვებით აშლილობებთან არის დაკავშირებული. მსგავსი აშლილობებით დატანჯული ადამიანები ფრუსტრაციას, სევდას და ბრაზს სწორედ ღამის საათებში ჭამით უმკლავდებიან. მათ ულუფების კონტროლი ძალიან უჭირთ და მაგიდასთან ყოფნის დროს უკონტროლოდ იკვებებიან. ზოგჯერ კვებითი აშლილობის გამო ადამიანები შუაღამით იღვიძებენ და დღიური კალორიების 25 %-ს სწორედ ამ დროს იღებენ. ეს ყოველივე დეპრესიას, ჭარბწონიანობას და ძილის დარღვევებს იწვევს. თუ ღამის საათებში ძალიან ბევრს მიირთმევთ, დეტალურად გაარკვიეთ, რა არის თქვენი ამგვარი ქცევის რეალური მიზეზი.

  • სტიმულატორების იდენტიფიცირება პრობლემის მოგვარებაში დაგეხმარებათ

ღამის საათებში კვების რეალური მიზეზის გარდა ის ფაქტორებიც უნდა გამოავლინოთ, რომლებიც გვიან ჭამისკენ გიბიძგებთ. ადამიანები საკვებს სხვადასხვა მიზეზით მიირთმევენ. თუ მშიერი არ ხართ, მაგრამ ღამით ჭამაზე უარს მაინც ვერ ამბობთ, გაარკვიეთ, რა გიბიძგებთ ამგვარი ქცევისკენ. შესაძლოა, ღამის საათებში კალორიების მიღება მოუწესრიგებელი დღის რეჟიმით იყოს გამოწვეული. სტიმულატორების დასადგენად გირჩევთ სპეციალური დღიური აწარმოოთ, რომელშიც დეტალურად აღწერთ მოვლენების განვითარებას და დააკვირდებით, რომელი მოვლენები ან ფაქტორები უძღვის წინ ღამის საათებში კალორიების მიღებას. დღიურის წერა თქვენი ნეგატიური ემოციების ამოცნობაშიც დაგეხმარებათ და იმ მავნე ჩვევებისგან გაგათავისუფლებთ, რომელთა გამოც უსიამოვნებებს თავს ვერ აღწევთ.

  • რუტინა ჩამოაყალიბეთ და ეცადეთ, მისი ერთგული იყოთ

ღამის საათებში კვების მიზეზი თუ დღის განმავლობაში კალორიების მცირე რაოდენობით მიღებაა, გირჩევთ რუტინა ჩამოაყალიბოთ, რომელსაც უერთგულებთ. სტრუქტურირებული,  მოწესრიგებული ძილისა და კვების რეჟიმი გვიან კვების მავნე ჩვევას დაგამარცხებინებთ. მიღებული კალორიებისა და წონის კონტროლი თუ გსურთ, ყველაზე დიდი ყურადღება ძილის რეჟიმს უნდა დაუთმოთ. აუცილებელია, რომ ყოველდღიურად კარგად გამოიძინოთ. ძილის ნაკლებობა კალორიების ჭარბად მიღებას უწყობს ხელს. ეს არაერთი ფართომასშტაბიანი კვლევით არის დადასტურებული. უძილობა ჭარბწონიანობის გამომწვევი ერთ-ერთი უმთავრესი მიზეზია. ის ჯანმრთელობისთვის უკიდურესად საზიანოა და თქვენს ფსიქიკაზეც ნეგატიურად ზემოქმედებს. ეცადეთ, საათობრივად იკვებოთ და დასაძინებლად ერთსა და იმავე დროს დაწვეთ. თუ ღამით გეღვიძებათ და ჭამთ, ძილის რეჟიმის მოწესრიგების შემდეგ ამ მავნე ჩვევასაც დაივიწყებთ, რაც პრობლემის მოგვარებაში დაგეხმარებათ.

  • თითოეული კვება კარგად უნდა დაგეგმოთ

კვების დაგეგმვა რუტინის ჩამოყალიბების შემადგენელი ნაწილია. მისი დახმარებით იმპულსურ კვებას გადაეჩვევით და მიღებული კალორიების რაოდენობას უკეთ გააკონტროლებთ. გარდა ამისა, საკვები პროდუქტების საგულდაგულოდ შერჩევა უსარგებლო კალორიების მიღებისგანაც დაგიცავთ. როდესაც კვება დაგეგმილი გაქვთ, ნაკლებად ღელავთ. თქვენ იცით, რომ ზედმეტ საკვებს არ მიირთმევთ და სინდისი არ გაწუხებთ. დღის მანძილზე პროდუქტები და კალორიები სწორად გაქვთ გადანაწილებული, რაც თქვენს განწყობაზე დადებითად აისახება. გარდა ამისა, რეგულარული კვება შიმშილის გრძნობას გაგინელებთ. თქვენ მადის მოზღვავება ნაკლებად შეგაწუხებთ, რაც ღამით მშვიდად დაძინების შესაძლებლობას მოგცემთ.

  • დახმარებისთვის პროფესიონალს მიმართეთ

თუ გრძნობთ, რომ კვებითი აშლილობა გაწუხებთ, დახმარებისთვის პროფესიონალს უნდა მიმართოთ. ის თქვენი პრობლემის გამომწვევი მიზეზების იდენტიფიცირებაში დაგეხმარებათ და მკურნალობის გეგმასაც გაგაცნობთ. როგორც წესი, კვებითი აშლილობების სამკურნალოდ კოგნიტურ-ბიჰევიორული თერაპია გამოიყენება. კვლევებით დასტურდება, რომ აღნიშნული მიდგომა ყველაზე მეტად ამართლებს, როდესაც ადამიანები პრობლემას თავს ვერაფრით აღწევენ. ემოციური მხარდაჭერის მიღება ფსიქოლოგიურად გაგაძლიერებთ. პროფესიონალის დახმარებით ნეგატიურ განწყობაზე ყოფნის დროს მაცივართან აღარ მიხვალთ, საკუთარ სისუსტეებს უფრო ეფექტური და ჯანსაღი მეთოდებით გაუმკლავდებით.

  • სტრესისგან გათავისუფლდით

შფოთვა და სტრესი ჭარბი კალორიების მიღებისკენ გიბიძგებთ. ნეგატიური ემოციების დასავიწყებლად საკვების გამოყენება არც ისე კარგი იდეაა. თუ გრძნობთ, რომ ცუდ ხასიათზე ყოფნისას ბევრს მიირთმევთ, ეცადეთ შფოთვას ან სტრესს სხვა მეთოდებით გაუმკლავდეთ. კვლევებით დასტურდება, რომ რელაქსაციის პროცედურები სტრესში მყოფ ადამიანებს ჭარბი კალორიების მიღებისგან იცავს. გაწელვის ვარჯიშები, იოგა, მედიტაცია, ცხელი აბაზანის მიღება ან სუნთქვითი ვარჯიშების ჩატარება ღამით კვების მავნე ჩვევის დაძლევაში დაგეხმარებათ.

  • დღის განმავლობაში რეგულარულად იკვებეთ

სისხლში შაქრის დონის ბალანსირებისთვის, გირჩევთ, დღის განმავლობაში გარკვეული ინტერვალების დაცვით ჯანსაღად იკვებოთ. რეგულარული კვება დაღლილობის, გაღიზიანებისა და მოუსვენრობის დამარცხებაშიც დაგეხმარებათ. თქვენ გამძაფრებული მადა აღარ გექნებათ. როდესაც ძალიან გშიათ, უპირატესობას არაჯანსაღ საკვებს ანიჭებთ, რომელიც შაქრითა და ცხიმებით არის გაჯერებული. თუ დღის განმავლობაში სამჯერ ან უფრო მეტჯერ მიირთმევთ, მადას მარტივად გააკონტროლებთ, რაც თავის მხრივ, ჯანსაღი წონის შენარჩუნებაშიც დაგეხმარებათ. თუ დღეში ერთხელ ან ორჯერ მიირთმევთ, ღამით მადის კონტროლი ძალიან გაგიჭირდებათ, რაც ჭარბწონიანობის პრობლემის წინაშე დაგაყენებთ.

  • თითოეული კვების დროს ცილა აუცილებლად უნდა მიიღოთ

თქვენს მადაზე სხვადასხვა პროდუქტები განსხვავებულ ზეგავლენას ახდენენ. თუ ჭამის დაწყებამდე მშიერი ხართ, ცილის მიღება შიმშილის გრძნობის დაძლევაში დაგეხმარებათ. ცილა დანაყრების შეგრძნებას გაგიჩენთ, რომელიც მთელი დღის განმავლობაში გაგყვებათ და ღამით წახემსების სურვილიც ნაკლებად შეგაწუხებთ. კვლევებით დგინდება, რომ ცილის რეგულარულად მიღება ღამით კვების მოთხოვნილებას 50 % - ით ამცირებს.

  • სახლში არაჯანსაღი საკვები არ შეინახოთ

ღამის საათებში მაღალცხიმიანი, შაქრის მაღალი შემცველობის მქონე პროდუქტების მირთმევა თუ გიყვართ, გირჩევთ, მსგავსი საკვები სახლში საერთოდ არ იქონიოთ. თუ სწრაფი კვების პროდუქტები და მსგავსი მავნე საკვები ახლოს არ გექნებათ, დიდი ალბათობით, ღამის საათებში მათ შესაძენად წასვლა დაგეზარებათ. სახლში აუცილებლად იქონიეთ ჯანსაღი, დაბალკალორიული პროდუქტები, რომლებსაც დღის განმავლობაში რეგულარულად მიირთმევთ. თუ მოგშივდებათ იოგურტი, ხაჭო, ხილი ან კენკრა მიირთვით. აღნიშნული პროდუქტები დაგანაყრებთ და ჭარბი კალორიების მიღებისგანაც დაგიცავთ.

  • ღამის საათებში საკუთარი თავისთვის საინტერესო გასართობი გამონახეთ

საღამოს მოწყენილი თუ ხართ და შიმშილის გრძნობაც გიტევთ, ნაცვლად იმისა, რომ საკვები მიირთვათ, გაიხსენეთ, რისი გაკეთება გაყენებთ კარგ განწყობაზე. ეცადეთ, გონება სხვა რამეზე გადართოთ და საჭმელი დაივიწყოთ. შეგიძლიათ, ახალი ჰობი აღმოაჩინოთ ან მეგობრებთან ერთად საინტერესო აქტივობები დაგეგმოთ. ამ გზით უსარგებლო კალორიების მიღებისგან თავის დაცვას შეძლებთ და ჭარბი წონის პრობლემაც აღარ შეგაწუხებთ.

გახსოვდეთ, ღამის საათებში კვება ჭარბი წონის, ჯანმრთელობის პრობლემების და შფოთვის გამომწვევი ერთ-ერთი მთავარი მიზეზია. თუ აღნიშნულ პრობლემასთან გამკლავება გიჭირთ, ჩვენ მიერ შემოთავაზებული სტრატეგიების გამოყენება სცადეთ. მათი დახმარებით ჭარბი კალორიების მიღებისგან თავის შეკავებას და დღის რეჟიმის მოწესრიგებას აუცილებლად შეძლებთ.

წარმატებებს გისურვებთ!

რეკომენდირებული პროდუქტები



დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა